Rumıniyada Dekabr inqilabının 35-ci ildönümü qeyd olunur
Buxarest, 22 dekabr, AZƏRTAC
Dekabrın 22-də Rumıniyada 1989-cu il Dekabr inqilabının 35-ci ildönümü qeyd olunur. Düz 35 il əvvəl Nikolaye Çauşesku rejiminin devrilməsi ilə ölkədə yeni bir dövrün başlanğıcı qoyulub.
Bayram tədbirləri çərçivəsində gülqoyma mərasimləri, hərbi tədbirlər və dini xidmətlər keçirilir. Dekabrın 1-də seçilən yeni parlament üzvləri ilk iclaslarında Dekabr inqilabının qurbanlarının xatirəsini bir dəqiqəlik sükutla anıblar.
Rumıniya Akademiyasının sədri tarixçi İon Aurel Pop 1989-cu il hadisələrinin 1918-ci ildəki Böyük Birləşmə hadisəsindən sonra ölkə tarixində ən vacib hadisə olduğunu vurğulayıb. O bildirib ki, bu hadisələr ölkədə mühüm dəyişikliklərə səbəb olub.
Rumıniya Prezidenti Klaus Yohannis öz mesajında demokratik dəyərlərin qorunmasının vacibliyini vurğulayaraq, populizm və yalan üzərində qurulan təhrif olunmuş bəyanatların bu prinsipləri təhdid etdiyini bildirib. Baş nazir Marçel Çolaku isə kommunizm rejiminin ideallaşdırılmasının kollektiv yaddaşa və kommunist rejiminin qurbanlarına ziyan verdiyini deyib.
Qeyd edək ki, 1989-cu ilin dekabrında Rumıniyada baş verən inqilab çox mühüm hadisələrə yol açıb. Dekabrın 21-də hakimiyyətin dəstəklənməsi üçün keçirilən mitinq antihökumət nümayişinə çevrilib və bu nümayiş təhlükəsizlik qüvvələri tərəfindən amansız şəkildə yatırılıb. Dekabrın 22-də isə Çauşesku və həyat yoldaşı Elena Buxarestdən helikopterlə qaçaraq ölkəni tərk ediblər. Həmin gün Rumıniyada Milli Qurtuluş Cəbhəsinin yaradılması elan olunub və İon İliesku ölkə prezidenti olub. Dekabrda 25-də Çauşesku və həyat yoldaşı mühakimə olunaraq Tîrgovişte şəhərində edam ediliblər. Bu inqilabdan sonra Rumıniyada böyük islahatlar aparılıb. Özəlləşdirmə bərpa edilib, çoxpartiyalı sistem yaradılıb və insan hüquqları təmin olunub. Rumıniyada Dekabr inqilabı ölkənin tarixindəki ən əsas hadisələrdən biri hesab olunur.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
