Rusiya aviaşirkəti Moskvadan Lənkərana uçuşlar həyata keçirəcək
Moskva, 7 iyun, AZƏRTAC
Rusiyanın “Utair” aviaşirkəti iyunun 22-dən etibarən Moskva ilə Lənkəran arasında uçuşlar həyata keçirəcək.
AZƏRTAC xəbər verir ki, bu barədə aviaşirkətin mətbuat xidməti məlumat yayıb.
Məlumatda qeyd olunub ki, aviareyslər hər həftənin şənbə günü həyata keçiriləcək. Təyyarə Moskvadan saat 17:00-da, Lənkərandan isə 22:50-də qalxacaq. Uçuş müddəti 3 saat 40 dəqiqədir.
“Utair” aviaşirkətinin prezidenti Oleq Semyonov qeyd edib ki, kompaniya yay aylarında xarici istiqamətlərdə uçuş proqramını xeyli genişləndirib və Antalya, Bakı, Səmərqəndə aviareyslər əlavə olunub. O bildirib: “İndi isə “Utair” üçün yeni istiqamətə - Lənkərana uçuşlara başlayırıq. Əminəm ki, Xəzərin sahilinə səyahət sərnişinlərimizin xoşuna gələcək”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
