RUSİYA FEDERASİYASININ PREZİDENTİ VLADİMİR PUTİN PREZİDENT HEYDƏR ƏLİYEVİN DƏFN MƏRASİMİNDƏ İŞTİRAK ETMİŞDİR
Böyük siyasətçi və dövlət xadimi Heydər Əliyevlə bağlı xatirələrini yada salan Rusiya Federasiyasının Prezidenti Vladimir Putin AZƏRTAC-ın müxbirinə demişdir ki, “Heydər Əliyev təkcə Azərbaycanda deyil, bütün keçmiş ittifaq miqyasında tanınmış şəxsiyyət idi. Onun barəsində müxtəlif fikirlər var idi, amma mən şəxsən onunla tanış olduqdan və birgə işlədikdən sonra Heydər Əliyevə münasibətim kökündən dəyişdi. Başa düşdüm ki, o, heyrətamiz insan, ağıllı, dəqiq, bacarıqlı rəhbər, əsl siyasətçidir. Heydər Əliyevin miqyası Azərbaycanın hüdudlarından çox-çox kənara çıxmışdı. Açıq deyim, Azərbaycanın bəxti gətirmişdir ki, dövlətin başında Avropa və dünya miqyasında tanınan bir siyasətçi dururdu. O, bir tərəfdən beynəlmiləlçi, digər tərəfdən isə öz yurdunun vətənpərvəri idi. Heydər Əliyev həm də Rusiyanın dostu idi. Bu böyük insanın vəfatı onu tanıyanların hamısını, o cümlədən şəxsən məni çox kədərləndirmişdir. Onunla şəxsi, çox səmimi münasibətlərimiz var idi. Allah rəhmət eləsin. Qəbri nurla dolsun.
X X X
Rusiya dövlətinin başçısı və onu müşayiət edən nümayəndə heyəti Binə hava limanından Prezident Heydər Əliyevlə vidalaşma mərasimi keçirilən Respublika sarayına gəlmişdir.
Prezident Vladimir Putinin adından ümummilli liderimiz Heydər Əliyevin cənazəsi önünə əklil qoyulmuşdur. Azərbaycan xalqının dahi oğlu Heydər Əliyevin nurlu xatirəsi önündə ehtiramla baş əyən Prezident Vladimir Putin dövlətimizin rəhbəri İlham Əliyevə və ailə üzvlərinə dərin hüznlə başsağlığı vermiş, onlara səbr və təmkin diləmişdir.
X X X
Rusiya Federasiyasının Prezidenti Vladimir Putin ilə Azərbaycan dövlətinin rəhbəri İlham Əliyev arasında qısa görüş olmuşdur. Söhbət əsnasında Vladimir Putin İlham Əliyevə bir daha başsağlığı vermiş, Azərbaycan xalqının kədərinə şərik olduğunu, Prezident Heydər Əliyevin işıqlı xatirəsinin onu tanıyanların hamısının qəlbində əbədi yaşayacağını bildirmişdir. Cənab Putin Rusiya-Azərbaycan əlaqələrinin əsası unudulmaz Heydər Əliyev tərəfindən qoyulmuş xətt üzrə bundan sonra da inkişaf edəcəyinə əminliyini söyləmişdir.
Prezident İlham Əliyev Azərbaycanın böyük oğlunun xatirəsinə yüksək ehtiramına və xalqımızın kədərinə qəlbən şərik olduğuna görə, Rusiya dövlətinin başçısı Vladimir Putinə təşəkkürünü bildirmişdir.
X X X
Həmin gün Rusiya Federasiyasının Prezidenti Vladimir Putin və onu müşayiət edən nümayəndə heyəti Moskvaya yola düşmüşdür.
Bölmənin digər xəbərləri
