RUSİYA FEDERASİYASININ PREZİDENTİ VLADİMİR PUTİNİN NİTQİ
-Hörmətli Heydər Əliyeviç!
Hörmətli xanımlar və cənablar!
Möhtərəm, əziz dostumuz Heydər Əliyeviç Əliyevi bu gün Kremldə salamlamaqdan böyük məmnunluq duyuram. Azərbaycan Prezidentinin Rusiyaya dövlət səfəri ölkələrimizin münasibətlərində mərhələ təşkil edən hadisədir. Biz gələcək üçün strateji istiqamətləri birlikdə müəyyənləşdirməli, iki qardaş xalqın çoxəsrlik tarixində yeni səhifə açmalıyıq. İndi biz yeni dövlətlərarası münasibətlər qururuq. Bu münasibətlərin əsasını bərabər hüquqlu tərəfdaşlıq prinsipləri, ideyaların praqmatizmi, bir-birinin maraqlarına qarşılıqlı hörmət təşkil edir.
Dünya birliyinin terrorizmlə mübarizədə birgə tədbirlərinin dəstəklənməsində Azərbaycan rəhbərliyinin tutduğu aydın siyasi mövqeyi Rusiyada yüksək qiymətləndirirlər. Rusiya və Azərbaycan bu sahədə səyləri həm antiterror koalisiyasının iştirakı ilə, həm də Müstəqil Dövlətlər Birliyi formatında və ikitərəfli səpkidə bundan sonra da sıx əlaqələndirmək niyyətindədirlər. Biz əminik ki, bu, beynəlxalq terrorizmə qarşı daha səmərəli mübarizə aparmağa, onu lokallaşdırmağa, gələcəkdə isə onun kökünü kəsməyə kömək edəcəkdir.
Dərhal vurğulamaq istərdim ki, biz bu məsələdə Azərbaycan Prezidentinin dəstəyini hiss edirik. Biz onun xüsusi təhlükəli cinayətkarların yaxalanması və Rusiyaya verilməsinə dair cəsarətli qərarlarından xəbərdarıq və buna görə Azərbaycan rəhbərliyinə təşəkkür etmək istərdim.
Rusiya ilə Azərbaycanı coğrafi cəhətdən Qafqaz dağları birləşdirir. Ona görə də vahid mövqelərdən çıxış etməyimiz, Qafqazın sülh və tərəqqi regionuna çevrilməsi üçün birgə səylər göstərməyimiz son dərəcə vacibdir. Dağlıq Oarabağ münaqişəsi rusiyalıların ürəyini ağrıdır. Qafqazda iki qonşu xalq arasında sülhün olmaması, yüz minlərlə qaçqının isə öz evlərinə qayıda bilməməsi bizdə kədərli hisslər doğurur. Biz Qarabağ problemini dinc vasitələrlə həll olunmasına səmimi qəlbdən kömək etməyə çalışırıq.
Təsdiq etmək istəyirəm ki, Azərbaycan və Erməni xalqları arasında mehriban qonşuluq münasibətlərinin möhkəmlənməsi üçün Rusiya özündən asılı olan hər şeyi edəcəkdir. Mühüm haldır ki, ölkələrimiz Xəzərlə bağlı problemlərdə öz mövqelərini ardıcıl surətdə yaxınlaşdırırlar. Ümidvarıq ki, digər sahilyanı dövlətlər də bizdən nümunə götürəcək və biz Xəzər dənizinin statusunu müəyyənləşdirməyə, təxirəsalınmaz problemləri, o cümlədən onun nadir bioloji ehtiyatlarının qorunması ilə bağlı problemləri birgə həll etməyə müvəffəq olacağıq.
Qəbələ radiolokasiya stansiyasının statusu haqqında bu gün bağlanmış sazişi ayrıca vurğulamaq istəyirəm. Bu sənədin həyata keçirilməsi sabitliyin və təhlükəsizliyin təkcə regional səviyyədə deyil, mübaliğəsiz deyə bilərik ki, qlobal səviyyədə də təmin edilməsinə ümumi sanballı töhfəmiz olacaqdır.
2010-cu ilədək olan dövrdə uzunmüddətli iqtisadi əməkdaşlıq haqqında müqavilə iqtisadi əlaqələri genişləndirmək üçün böyük perspektivlər açır. Bizim birgə işimiz göstərmişdir ki, Rusiya-Azərbaycan ticarət-iqtisadi əməkdaşlığının ciddi potensial ehtiyatları var və gələcək üçün də yaxşı potensial var. Bu potensialın reallaşdırılması üçün bizə miras qalmış və son illər əldə olunmuş işgüzar və texnoloji qarşılıqlı əlaqələrdən də - o cümlədən energetika, metallurgiya, maşınqayırma, yüngül sənaye, yeyinti sənayesi, nəqliyyat və infrasturuktur kimi mühüm sahələrdə maksimum istifadə etməliyik. İşgüzar əməkdaşlığımızın sanballı təcrübəsi qarşılıqlı surətdə dolğunlaşır, bizə əslində bütün fəaliyyət sahələrində müvəffəqiyyətə ümid bəsləməyə imkan verir.
Biz artıq dəfələrlə yəqin etmişik ki, Rusiya-Azərbaycan kooperasiyasının dərinləşməsi real iqtisadi fayda gətirir və əhalinin sosial problemlərinin həllinə kömək edir. Rusiyada Azərbaycan mədəniyyəti günlərinin necə maraqla və diqqətlə qarşılandığını bilirsiniz. Mədəniyyət, elm, təhsil sahəsində çoxdankı və olduqca möhkəm əlaqələrimiz güclü mənəvi qüvvəyə malikdir, əməkdaşlıq üçün yaxşı zəmin yaradır. Məhz bu əlaqələr mədəni ənənələrimizi əsrdən-əsrə zənginləşdirmiş, milli inkişafa müsbət təsir göstərmiş, xalqlarımızı yaxınlaşdırmış və birləşdirmişdir. Odur ki, biz gələcəkdə bu əlaqələrin möhkəmlənməsinin və inkişafının davam etməsi üçün birgə işləməyə hazırıq.
Hörmətli Heydər Əliyeviç, hörmətli xanımlar və cənablar! Mən ötən ilin yanvarında Bakıya səfərimi də, bütün Rusiya nümayəndə heyətinin son dərəcə mehribanlıqla qarşılandığını da səmimiyyətlə xatırlayıram. Əlbəttə, həm Rusiyaya, həm də Rusiya xalqına ünvanlanmış səmimi və xoş sözləriniz bizim hamımızı riqqətə gətirmişdi. Böyük Nizami demişdir: Ürəkdən gələn söz həmişə ürəyə yol tapır.
Bu gün, yeni əsrin başlanğıcında başa düşürük ki, Rusiya və Azərbaycan xalqları arasında münasibətlərdəki açıqlıq və etimad bizim ümumi sərvətimizdir, onu qoruyub saxlamalı və artırmalıyıq.
İcazə verin, qardaş xalqlarımızın firavanlığı və tərəqqisi şərəfinə, Rusiya ilə Azərbaycan arasında strateji, çoxtərəfli tərəfdaşlığın möhkəmlənməsi şərəfinə, Azərbaycan xalqının şərəfinə və onun Prezidentinin şərəfinə, Heydər Əliyeviç Əliyevin şərəfinə badə qaldırım.
Bölmənin digər xəbərləri
