RUSİYADA UŞAQLARIN TƏRBİYƏSİ İLƏ MƏŞĞUL OLMAYAN VALİDEYNLƏR HƏBS EDİLƏCƏK
Dövlət Dumasının Qadınlar, ailələr və gənclərin işləri Komitəsinin sədri Yekaterina Laxova bildirmişdir ki, müxtəlif araşdırmalara görə, Rusiyada 100 mindən 4 milyonadək kimsəsiz uşaq var. Rəsmi statistikaya görə, 16 min məktəbyaşlı uşaq, ümumiyyətlə, məktəbə getmir, hər il 50 min uşaq evdən qaçır. Narkotiklərdən istifadə edənlərin əksəriyyəti yeniyetmələrdir. Məktəblər isə “problemli” şagirdlərdən yaxa qurtarmağa çalışırlar.
Hazırda hüquq mühafizə orqanlarının belə bir vəziyyətlə mübarizə üsulu yoxdur. Lakin tezliklə vəziyyət dəyişə bilər. İndi Dövlət Duması eyni vaxtda bir neçə qanuna düzəlişlər üzərində işləyir və bu düzəlişlər, deputatların fikrincə, bunlar uşaqların sahibsiz qalması ilə mübarizə aparmağa kömək edəcəkdir.
Yeni tədbirlər daha çox öz uşaqlarının tərbiyəsi ilə məşğul olmayan valideynlərə aiddir: belə valideynlər azadlıqdan məhrum ediləcəklər. Lakin onların hansı müddətə həbs olunacaqları hələlik məlum deyildir. Mövcud qanunvericiliyə görə, belə valideynlər indi cəmi 100-500 rubl məbləğində cərimə olunurlar.
