Rusiyadakı Azərbaycan diasporu Türkiyəyə maddi və humanitar yardım göstərib
Bakı, 16 fevral, AZƏRTAC
Türkiyədə zəlzələ baş verən ilk gündən etibarən Rusiyada fəaliyyət göstərən Azərbaycan diaspor təşkilatları zərərçəkənlərə yardım kampaniyalarında fəal iştirak edirlər.
Diasporla İş üzrə Dövlət Komitəsindən AZƏRTAC-a bildiriblər ki, Rusiyanın Sverdlovsk vilayətində və Yekaterinburq şəhərində fəaliyyət göstərən “Ural-Azərbaycan” Sverdlovsk vilayəti milli-mədəni regional təşkilatı indiyədək 642 min manat (28 milyon rubl) dəyərində humanitar yardımı qardaş ölkənin zəlzələ bölgəsinə yola salıb.
Bundan başqa, “Ural-Azərbaycan” Sverdlovsk vilayəti milli-mədəni regional təşkilatı Kurqan və Tümen vilayətlərindəki Azərbaycan icmaları ilə birlikdə 86 min 400 manat məbləğində humanitar yardımı (72 biotualet) Türkiyəyə göndərib.
Stavropol vilayətinin Pyatiqorsk şəhərində fəaliyyət göstərən “Araz” Azərbaycan Milli-Mədəni Muxtariyyəti 81 min manat (3 milyon rubl) dəyərində humanitar yardımı Türkiyənin Novorossiysk şəhərindəki Baş konsulluğuna təhvil verib. Bu kampaniyada “Araz”ın Pyatiqorsk, Kislovodsk, Mineralnıye Vodı, Yessentuki, Georgiyevsk, Budyonovsk, Nevinnomıssk, Stavropol şəhərlərindəki təşkilatları, Qaraçay-Çərkəz, Kabardin-Balkar respublikalarındakı Azərbaycan diaspor təşkilatları üzvləri və Şimali Qafqazda yaşayan müxtəlif icmalar iştirak ediblər.
“Tatarıstan Respublikası Azərbaycan Milli-Mədəni Muxtariyyəti” regional ictimai təşkilatı 81 min 300 manat (3,5 milyon rubl) dəyərində maddi və humanitar yardımı Türkiyənin Kazandakı Baş konsulluğuna təhvil verib
Tatarıstanın Leninoqorsk rayonunda və şəhərindəki Azərbaycan diasporunun da daxil olduğu “Türkiyəyə yardım” Azərbaycan təşəbbüs qrupu 1 milyon 650 min rubl nağd vəsaiti müvafiq hesaba köçürüb və toplanan humanitar yardımı Türkiyənin Kazan şəhərindəki Baş konsulluğuna təqdim edib.
Başqırdıstan Azərbaycan Xalqının Dostluq Evi 55 min manat (2 milyon 345 min rubl) məbləğində maddi və humanitar yardımı Türkiyənin Tatarıstandakı Baş konsulluğu vasitəsilə qardaş ölkəyə çatdırıb.
“Sankt-Peterburq şəhəri və Leninqrad vilayəti üzrə azərbaycanlıların milli-mədəni muxtariyyəti” şəhər ictimai təşkilatı qardaş ölkəyə 45 min manat (1,5 milyon rubl) dəyərində maddi və humanitar yardım göstərib.
Sankt-Peterburq şəhərindəki Sofiyski meyvə-tərəvəz bazarında çalışan azərbaycanlı iş adamları 34 min manat dəyərində humanitar yardımı Türkiyənin Sankt-Peterburqdakı Baş konsulluğuna təhvil verib. Sankt-Peterburqdakı Azərbaycan Humanitar Əməkdaşlıq Mərkəzi 3200 manat (140 min rubl) maddi vəsaiti Türkiyənin Sankt-Peterburqdakı Baş konsulluğunun hesabına köçürüb və zəlzələdən zərərçəkən 250 nəfər üçün humanitar yardım təhvil verib.
“Perm diyarı üzrə Azərbaycanlıların Regional Milli Mədəni Muxtariyyəti” ictimai təşkilatı 35 min manat (1,5 milyon rubl) dəyərində çadır və qızdırıcı avadanlıqlardan ibarət humanitar yardımı Türkiyənin Kazandakı Baş konsulluğuna göndərib.
İndiyədək Yaroslavl vilayətindəki Azərbaycan icması 23 min manat (1 milyon rubl), Krasnoyarsk Azərbaycanlıları Milli-Mədəni Muxtariyyəti 22 min manat (1 milyon rubl), “Azərbaycan” Çelyabinsk ictimai təşkilatı 11 min 600 manat (500 min rubl), “Xakasiya Respublikası Azərbaycanlılarının Diasporu” Regional İctimai Təşkilatı 9400 manat (400 min rubl), Samara Vilayəti Azərbaycanlıları Liqası 7600 manat (328 min rubl), “Rusiya Azərbaycan Qadınları” İctimai Təşkilatı 5636 manat (244 min rubl), Kirov şəhərindəki “Birlik” Azərbaycan Mədəniyyət Mərkəzi Regional Təşkilatı, Solikamskdakı Azərbaycan diasporu, İvanovodakı Azərbaycan diasporu, Komi Azərbaycanlıları Milli-Mədəni Muxtariyyətinin hər biri isə 2330 manat (100 min rubl) məbləğində maddi və humanitar yardım göstərib.
Rusiyadakı diaspor təşkilatları humanitar yardım kampaniyasında iştirak edən bütün soydaşlarımıza və xeyirxah şəxslərə təşəkkür ediblər.
Bölmənin digər xəbərləri
