RUSİYANIN AZƏRBAYCANDAKI SƏFİRİ ŞƏKİDƏ OLMUŞDUR
Səfir şəhərdəki 8 nömrəli orta məktəbin kollektivi ilə görüşmüş, rus dilində bədii ədəbiyyat dəstini məktəbin kitabxanasına hədiyyə etmişdir.
Şəki Şəhər İcra Hakimiyyətindən AZƏRTAC-a bildirmişlər ki, bu münasibətlə məktəbdə keçirilən tədbirdə rusiyalı qonağı səmimi salamlayan şəhər təhsil şöbəsinin müdiri Firədun İbrahimov ölkələrimiz arasında iqtisadi əməkdaşlığın, elm, təhsil, mədəniyyət və incəsənət sahələrində əlaqələrin uğurla inkişaf etdiyini bildirmiş, respublikamızın ali və orta təhsil məktəblərində rus dili fənninin tədrisinin həmişə olduğu kimi, yenə də diqqət mərkəzində saxlanıldığını xüsusi vurğulamışdır.
Məktəbin direktoru Səttar Ələsgərov çıxış edərək burada təhsil alan 1168 nəfər şagirdin 778-nin rus bölməsində oxuduğunu, təhsil ocağında rus dili fənni və rus ədəbiyyatının geniş tədris olunduğunu bildirmiş, şagirdlərin uğurları barədə danışmış, dəyərli hədiyyələrə görə Rusiya səfirinə təşəkkür etmişdir.
Səfir Vasili İstratov çıxış edərək səmimi sözlərə görə şəhər təhsil şöbəsinin və məktəbin rəhbərliyinə minnətdarlığını bildirmiş, Şəkiyə ilk dəfə 2006-cı ilin avqustunda “İpək bayramı”nda iştirak etmək üçün gəldiyini xatırlatmış, bu səfərin onda böyük təəssürat yaratdığını qeyd etmişdir.
Bölmənin digər xəbərləri
