RUSLAN BƏŞİRLİYƏ VƏ QEYRİLƏRİNƏ ELAN EDİLMİŞ İTTİHAMLARA ZBİQNEV BJEZİNSKİNİN HEÇ BİR AİDİYYƏTİ YOXDUR
AZƏRTAC-ın müxbiri bununla bağlı Azərbaycan Respublikası Prokurorluğu mətbuat xidmətinin rəhbəri Vüqar Əliyevdən Prokurorluğun mövqeyini açıqlamağı xahiş etmişdir.
V.Əliyev demişdir: Əvvəllər ictimaiyyətə xəbər verildiyi kimi, “Yeni fikir” gənclər hərəkatının sədri Ruslan Bəşirli və qeyriləri Azərbaycan Respublikası CM-in 278-ci (hakimiyyəti zorla ələ keçirmə və ya onu zorla saxlama) və digər maddələri ilə təqsirləndirilən şəxs qismində cinayət məsuliyyətinə cəlb edilmişlər.
Bu il martın 15-də cinayət işinin istintaqı tamamlanmış, ittiham aktı təsdiq edilməklə baxılması üçün Ağır Cinayətlərə Dair İşlər üzrə Azərbaycan Respublikası Məhkəməsinə göndərilmişdir. Hazırda cinayət işi məhkəmə baxışındadır və açıq məhkəmə prosesi davam edir.
Qeyd etmək istərdim ki, radikal mövqedə olan bir sıra müxalifət qüvvələri qanunvericiliklə cinayət təqibi yaradan əməllər törətmiş Ruslan Bəşirlinin və başqalarının məhkəmə prosesindən siyasi məqsədlər üçün istifadə etməyə ciddi cəhdlər göstərirlər. Son günlər həmin qüvvələr kütləvi informasiya vasitələrində həqiqətə uyğun olmayan, əslində sensasiya yaratmaq və siyasi dividend qazanmaq məqsədi güdən yalan məlumat yayırlar.
Mən bu məsələ ilə bağlı Respublika Prokurorluğunun mövqeyini ictimaiyyətə çatdırmaq istəyirəm və bu mövqe cinayət işinin materiallarına əsaslanır. Qətiyyətlə bildiririk ki, cinayət işinin materiallarında və hazırkı məhkəmə baxışında Ruslan Bəşirli və qeyrilərinə elan edilmiş ittihamlara tanınmış politoloq Zbiqnev Bjezinskinin heç bir aidiyyəti yoxdur və bununla əlaqədar hər hansı bir istintaq araşdırılması aparılmamışdır.
