Sabirabadda 7 min 793 hektar sahəyə çiyid səpilib
Sabirabad, 3 may, Mahir Babayev, AZƏRTAC
Sabirabadda çiyid səpini sürətlə davam edir. Ötən il 17 min 292 ton xam pambıq istehsal edən sabirabadlı əkinçilər cari ildə 8 min 630 hektar sahədə pambıq əkməyi planlaşdırıblar. Məhsul yetişdirmək üçün rayonda bütün lazımi tədbirlər vaxtında həyata keçirilib, müqavilə bağlanılmış məhsul istehsalçıları lazımi texnika, toxum və dərman preparatları ilə təmin olunublar.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildiriblər ki, səpin kampaniyasına mütəşəkkil başlayan əkinçilər qısa müddətdə 7 min 793 hektar sahəyə çiyid səpiblər. İşin yaxşı təşkili nəticəsində gün ərzində rayon üzrə ümumilikdə 200-250 hektar sahəyə çiyid səpilir. Səpin aparılmış sahənin 2625 hektarı “MKT” MMC-yə, 293 hektarı “Azərpambıq” MMC-yə, 475 hektarı “AQRO AZ” MMC-yə, 1753 hektarı isə “KT” MMC-yə məxsusdur. Məhsul istehsalçıları səpini vaxtında başa çatdırmaq üçün bütün imkanlardan səmərəli istifadə edirlər.
Bölmənin digər xəbərləri
