Şahmat üzrə dünya çempionu Maqnus Karlsenin yeni rekordu
Bakı, 15 yanvar, AZƏRTAC
Şahmat üzrə hazırkı dünya çempionu norveçli Maqnus Karlsen məğlubiyyətsiz oyunlar seriyasına görə yeni rekorda imza atıb.
AZƏRTAC xəbər verir ki, Niderlandın Veyk-an-Zee şəhərində keçirilən və şahmatçımız Rauf Məmmədovun da qatıldığı “Tata Steel Chess 2020” turnirində yerli idmançı Yorden van Forest ilə heç-heçəyə imza atıb. Bununla da dünya çempionu ardıcıl məğlubiyyətsiz oyunların sayını 111-ə çatdırıb. Bundan əvvəlki rekord rusiyalı şahmatçı Sergey Tivyakova məxsus idi. O, 2005-ci ildə ardıcıl 110 oyunda məğlub olmayıb.
Qeyd edək ki, Rauf Məmmədov “Tata Steel Chess 2020” turnirinin B qrupunda uğurla çıxış edir. O, dörd turun nəticəsinə görə 2,5 xalla 2-5-ci yerləri bölüşür.
Yanvarın 15-i turnirin iştirakçıları üçün istirahət günüdür. Yanvarın 16-da beşinci turun oyunları keçiriləcək.
Bölmənin digər xəbərləri
