SALVADOR DALİNİN BORCUNU İSPANİYA KRALI ÖDƏYƏCƏK
25 il əvvəl Dali onunla imzaladığı müqaviləyə əsasən, Latın Amerikasının milli qəhrəmanı Simon Bolivarın vəfatının 150 illiyi ilə əlaqədar 57x76 sm ölçüdə iki qravür hazırlamalı idi. O, müqaviləni imzalayıb, pulu aldığı gündən kolumbiyalı naşirin gözünə görünməmişdir. Samoranonun dalbadal göndərdiyi məktubların cavablarında deyilirdi ki, Dali “can üstündədir”, “dərin ruhi sıxıntı içindədir”, milliyyətcə rus olan arvadı Qalanın 1982-ci ildə ölümündən sonra “heç cür özünə gələ bilmir”. Beləliklə, Dali nə sifarişi yerinə yetirmiş, nə də pulu qaytarmışdır. O, 1989-cu ildə canını tapşırmış, Samorano isə müflisləşmişdir, çünki bütün pullarını bu layihənin həyata keçirilməsinə qoymuşdu. Hətta bundan ötrü Parisdə ofis də açmışdı.
Dali bütün mirasını İspaniya dövlətinə vəsiyyət etmişdir. Həm də, buna özünün yaratdığı Qala-Salvador Dali Fondu cavabdeh idi. Fondun sədri İspaniya kralı Xuan Karlos olduğuna görə, mərhum rəssamın borclarını ödəmək vəzifəsi onun üzərinə düşmüşdür. Kral Kolumbiya Mədəniyyət Nazirliyinə bildirmişdir ki, Samoranonu razı salan təklif verəcəkdir.
