SALYANDA İNSAN HÜQUQLARININ MÜDAFİƏSİ ÜZRƏ MİLLİ FƏALİYYƏT PLANININ HƏYATA KEÇİRİLMƏSİ VƏZİYYƏTİ MÜZAKİRƏ OLUNMUŞDUR
Ombudsman Elmira Süleymanova insan hüquqlarının müdafiəsi üzrə Milli Fəaliyyət Planının (MFP) həyata keçirilməsi vəziyyətinin monitorinqi məqsədi ilə Salyan rayonunda ictimai dinləmələr keçirmişdir.
Ombudsman Aparatından AZƏRTAC-a bildirmişlər ki, ictimai dinləmədə rayon icra hakimiyyəti və bələdiyyələrin, məhkəmə, daxili işlər şöbəsi və prokurorluğun, dairə seçki komissiyalarının, ictimai qurumların, yerli qeyri-hökumət təşkilatlarının və icmaların nümayəndələri iştirak etmişlər.
İnsan hüquqları üzrə müvəkkil E.Süleymanova MFP-nin tətbiqi ilə bağlı görülən işlər barədə məlumat vermişdir.
Müzakirələrdə çıxış edənlər MFP-də məhkəmə, prokurorluq və polis orqanları qarşısında qoyulmuş vəzifələrin icrası istiqamətində görülmüş işlər, müvafiq dövlət orqanlarında insan hüquq və azadlıqlarının təmin olunmasına xüsusi nəzarət vətəndaşlara şəxsiyyət vəsiqələrinin verilməsi sahəsində vəziyyət barədə danışmışlar.
Səfər çərçivəsində Ombudsman Salyan Rayon Polis Şöbəsinin müvəqqəti saxlama təcridxanasına baxış keçirmişdir.
