Şamaxı WUF13 çərçivəsində xarici qonaqlara Azərbaycanın turizm zənginliyini nümayiş etdirəcək - REPORTAJ
Şamaxı, 17 may, AZƏRTAC
Dağların qoynunda qərar tutan, səhərlərini duman, axşamlarını isə sərin meh ilə qarşılayan Şamaxı Azərbaycanın turizm xəritəsində xüsusi yer tutur. Füsunkar təbiəti, əlverişli coğrafi mövqeyi, zəngin tarixi irsi, kənd turizmi imkanları və sürətlə inkişaf edən hotelçilik infrastrukturu rayonu həm yerli, həm də xarici turistlərin ən çox üz tutduğu bölgələrdən birinə çevirib.
AZƏRTAC-ın bölgə müxbiri xəbər verir ki, Şamaxıya gələn hər bir qonaq burada yalnız istirahət etmir, həm də qədim tarixlə təbiətin harmoniyasını yaşayır. Şəhərin mərkəzində fəaliyyət göstərən müasir hotellərdən tutmuş ucqar dağ kəndlərində yerləşən komfortlu kənd evlərinədək yaradılan şərait turistlərə fərqli seçim imkanı təqdim edir. Rayonun qədim türbələri, tarixi memarlıq nümunələri, sıx meşələri, saf bulaqları, zəngin flora və faunası, gölləri və dağ mənzərələri bölgəni xüsusilə cazibədar edir.
Turistlərin ən çox maraq göstərdiyi məkanlardan biri təmiz havası və oksigen bolluğu ilə seçilən Pirqulu ərazisidir. Təbiətin qoynunda yaradılmış müasir istirahət mərkəzləri, komfortlu kotteclər və sakit atmosfer bölgəyə gələn qonaqların sayını ildən-ilə artırır. Xüsusilə yay mövsümündə Pirqulu ailəvi istirahət və ekoturizm üçün ən çox seçilən ünvanlardan hesab olunur.
Şamaxının turizm potensialını artıran əsas amillərdən biri də paytaxt Bakı ilə rayon arasında mövcud olan rahat və müasir avtomobil yoludur. Rayona qısa müddətdə çatmaq imkanı həm yerli, həm də xarici turistlərin bölgəyə marağını daha da artırır. Bununla yanaşı, Azərbaycanda hökm sürən sabitlik, təhlükəsizlik və yüksək qonaqpərvərlik mühiti də ölkəmizə gələn qonaqların rahat və maneəsiz istirahət etməsinə geniş imkanlar açır.
İsmayıllı Regional Turizm İdarəsinin rəisi Günay Rzayeva AZƏRTAC-a bildirib ki, Şamaxı Azərbaycanın ən qədim və zəngin tarixə malik turizm istiqamətlərindən biridir. Onun sözlərinə görə, şəhər əsrlər boyu ölkənin elm, ədəbiyyat və mədəniyyət mərkəzlərindən biri olub və bu gün də tarixi-mədəni irsi ilə seçilir. “Şamaxı Cümə məscidi, Yeddi Günbəz türbələri və Dəmirçi kəndi kimi məkanlar turistlərin böyük marağına səbəb olur. Rayonun dağlıq relyefi, meşələri və saf iqlimi isə ekoturizm, kənd turizmi və macəra turizmi üçün geniş imkanlar açır. Son illərdə regionda turizm infrastrukturunun inkişafı istiqamətində mühüm işlər görülüb, yerləşmə vasitələrinin, istirahət mərkəzlərinin və xidmət sahələrinin sayı artıb. Turistlərin rahat və təhlükəsiz istirahəti üçün müasir şərait yaradılıb, ailəvi istirahət, kənd həyatı ilə tanışlıq və milli mətbəx nümunələrinin təqdimatı genişləndirilib. Bildiyiniz kimi, ölkəmizdə keçirilən beynəlxalq və yerli tədbirlər, festivallar, mədəniyyət və idman layihələri regionlara turist axınının artmasına mühüm təsir göstərir. Xüsusilə Şamaxı kimi zəngin tarixi və təbii resurslara malik bölgələrdə təşkil olunan tədbirlər turistlərin marağını artırır”, – deyə idarə rəisi vurğulayıb.
Hazırda Şamaxı şəhəri və rayonun digər kənd-qəsəbələri ərazisində 40-a yaxın yerləşmə məkanı fəaliyyət göstərir. Bu məkanlar uyğun xidmətlər təqdim etməklə yanaşı, turistlərə yüksəksəviyyəli qonaqpərvərlik və komfortlu istirahət imkanları yaradır.
Bu günlərdə ölkəmizdə keçirilən BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində Azərbaycana gələcək xarici qonaqların bölgələrə səfərləri də nəzərdə tutulur. Səfər proqramına daxil edilən istiqamətlərdən biri də Şamaxıdır. Rayon artıq qonaqları qəbul etməyə tam hazırdır.
Şamaxıdakı hotellərdən birinin rəhbəri Yunis Qurbanlı bildirib ki, qısa müddətdə münasib qiymət, yüksək xidmət və müasir yanaşma sayəsində həm ölkə daxilində, həm də bir sıra Avropa ölkələrində tanınmağa nail olublar. Onun sözlərinə görə, əsasən xarici turistlərin üz tutduğu hotellərdə müasir xidmət sistemi qurulub, geniş restoranlarda yerli və dünya mətbəxinin ləziz təamları təqdim edilir.
Təbiət qoynunda yerləşən istirahət mərkəzləri də bölgəyə gələcək qonaqları qarşılamağa hazırdır. Digər hotelin nümayəndəsi Məhərrəm Əliyev qeyd edib ki, fərqli konsepsiyada fəaliyyət göstərən istirahət mərkəzlərində həm kotteclərdən, həm də hotel xidmətlərindən yararlanmaq mümkündür. “Qonaqlar üçün hər cür şərait yaradılıb. Şamaxıya və Pirquluya üz tutan turistləri qarşılamağa hazırıq”, – deyə o bildirib.
Rayonun kəndlərində fəaliyyət göstərən günlük kirayə evlər də turistlərin diqqət mərkəzindədir. Nağaraxana kənd sakini Təhsin Hüseynovun sözlərinə görə, kənd evləri müxtəlif üslublarda turistlərə təqdim olunur. “Klassik və qədim üslubda tikilmiş kənd evləri, tam şəraitli villalar və müasir dizaynlı fərdi evlər qonaqlara seçim imkanı yaradır. Bu da istənilən büdcəyə uyğun istirahət etməyə şərait yaradır”, – deyə kənd sakini qeyd edib.
Bir sözlə, WUF13 iştirakçıları və digər turistlər Şamaxıya səfər etdikləri təqdirdə burada onları möhtəşəm təbiət mənzərələri, zəngin tarix, milli və dünya mətbəxinin nümunələri, qədim abidələr və unudulmaz istirahət gözləyir.
Müxbir- Rəşad Türkoğlu
Bölmənin digər xəbərləri
