Kanada rəsmisi: Ümumdünya Şəhərsalma Forumu mühüm platformadır
Bakı, 17 may, AZƏRTAC
Kanada hökuməti 2017-ci ildə uzunmüddətli Milli Mənzil Strategiyasını qəbul edib. Strategiya çərçivəsində mənzilə ən çox ehtiyacı olan əhali qruplarının dəstəklənməsi üçün on ildən artıq dövrü əhatə edən 115 milyard dollardan çox federal investisiya nəzərdə tutulub.
AZƏRTAC xəbər verir ki, bu fikirləri Kanadanın mənzil, infrastruktur və icmalar nazirinin müavini vəzifəsini icra edən Janet Golding Bakıda keçirilən Ümumdünya Şəhərsalma Forumunun 13-cü Sessiyası (WUF13) çərçivəsində nazirlərin dəyirmi masasında səsləndirib.
Kanada rəsmisi qeyd edib ki, ölkə qarşıdakı illərdə üç əsas istiqamətə üstünlük verəcək. Bunlar mənzil tikintisinin sürətləndirilməsi, inklüziv inkişaf və tərəfdaşlıqların gücləndirilməsi, həmçinin iqlim dəyişikliyinə davamlı və enerji səmərəli şəhərlərin qurulmasıdır.
O vurğulayıb ki, Ümumdünya Şəhərsalma Forumu ölkələr arasında təcrübə mübadiləsi və ortaq həllərin müəyyənləşdirilməsi baxımından mühüm platformadır. “Kanada həm öz təcrübəsini bölüşməyə, həm də digər ölkələrin təcrübəsindən öyrənməyə hazırdır”, – deyə Janet Golding əlavə edib.
Bölmənin digər xəbərləri
