Tələbə: WUF13 mənə şəhərlərin inkişafına dair daha fərqli yanaşma qazandırdı
Bakı, 29 may, AZƏRTAC
Ümumdünya Şəhərsalma Forumunun 13-cü Sessiyası (WUF13) mənə şəhərlərə sadəcə bina, yol və infrastruktur kimi deyil, insanların yaşadığı, nəfəs aldığı və gündəlik həyatını qurduğu bir mühit kimi baxmağı öyrətdi. Sessiyada əsas vurğulanan məsələlərdən biri şəhərlərin insanlar üçün daha rahat, təhlükəsiz və yaşana bilən olması idi. Mən də düşünürəm ki, yaxşı şəhər yalnız müasir görünən və hündür binaların tikildiyi yer deyil. Əsl yaxşı şəhər insanların özünü rahat hiss etdiyi, sərbəst hərəkət edə bildiyi, təmiz mühitdə yaşadığı və sosial həyatını rahat qura bildiyi şəhərdir.
Bunu AZƏRTAC-a açıqlamasında Azərbaycan Dövlət İqtisad Universitetinin tələbəsi Cavidan Məmmədov deyib.
O, fikirlərinə belə davam edib: "Tələbə kimi mənə maraqlı olan məqamlardan biri də gələcəyin şəhərlərinin necə formalaşacağı idi. Tədbirdə tez-tez yaşıllıq zonalarının artırılması, ictimai nəqliyyatın inkişaf etdirilməsi, piyadalar üçün əlverişli küçələrin yaradılması və insanların rahatlığının ön plana çəkilməsi barədə danışılırdı. Məncə, gələcəkdə şəhərsalma daha çox insanyönümlü olacaq. Böyük və müasir binaların tikilməsi vacibdir, lakin insanların gündəlik həyat keyfiyyəti bundan daha önəmlidir. Vətəndaşların rahat hərəkət edə bilməsi, park və ictimai məkanlardan istifadə etməsi, ekoloji cəhətdən sağlam mühitdə yaşaması şəhərin inkişaf səviyyəsini göstərən əsas amillərdəndir.
WUF13-də fərqli ölkələrdən gələn mütəxəssislərin çıxışlarını dinləmək xüsusilə maraqlı idi. Hər kəs öz şəhərində qarşılaşdığı problemlərdən, urbanizasiya prosesindən və bu problemlərin həlli yollarından danışırdı. Bu müzakirələr göstərirdi ki, şəhərsalma sadəcə memarlıq və tikinti sahəsi deyil, insanların həyatına birbaşa təsir edən sosial məsələdir. Çünki şəhərlərin planlaşdırılması insanların gündəlik rahatlığına, psixoloji vəziyyətinə, sosial münasibətlərinə və ümumi həyat keyfiyyətinə təsir göstərir.
WUF13 mənim üçün həm yeni biliklər qazanmaq, həm də dünyaya daha geniş baxış formalaşdırmaq baxımından çox faydalı təcrübə oldu. Burada müxtəlif ölkələrdən olan insanların fərqli düşüncə tərzi ilə tanış olmaq mənə şəhərlərin inkişafına dair daha fərqli yanaşma qazandırdı. Eyni zamanda, belə beynəlxalq tədbirlərin Azərbaycanda keçirilməsi də çox önəmlidir. Bu, həm ölkəmizin dünya arenasında nüfuzunu, həm mövcud problemlərin həlli istiqamətində beynəlxalq əməkdaşlığı gücləndirməsində rolunu göstərir, həm də gənclərin dünyagörüşünün formalaşmasına, yeni ideyalar qazanmasına və gələcəyə daha müasir düşüncə ilə yanaşmasına kömək edir".
Müxbir - Göyçək Mahmudlu
Bölmənin digər xəbərləri
