TDT mühüm geosiyasi güc mərkəzlərindən birinə çevrilir - ŞƏRH
Bakı, 17 may, AZƏRTAC
Hazırda Türk dünyası, türk dövlətləri və türk xalqları ciddi inteqrasiya mərhələsindən keçir. Bu proses artıq şüarçılıq çərçivəsindən çıxaraq real siyasi və geosiyasi platformaya transformasiya olunmaqdadır. Türk Dövlətləri Təşkilatı (TDT) getdikcə regional və qlobal miqyasda mühüm geosiyasi güc mərkəzlərindən birinə çevrilir.
Bu fikirləri AZƏRTAC-a açıqlamasında siyasi şərhçi Mübariz Göyüşlü səsləndirib.
O bildirib ki, TDT-yə üzv dövlətlərin regional və qlobal proseslərin formalaşmasında və istiqamətləndirilməsində əhəmiyyətli rol oynadığı müşahidə olunur. Azərbaycan da təşkilatın fəal üzvü kimi bu prosesdə xüsusi dinamizm nümayiş etdirir. Təşkilata sədrliyi uğurla başa çatdıran Azərbaycan hazırda türk dövlətləri arasında əməkdaşlığın dərinləşdirilməsi istiqamətində ardıcıl və məqsədyönlü təşəbbüslərlə çıxış edir.
Mübariz Göyüşlü xatırladıb ki, 2025-ci ildə Azərbaycanın təşəbbüsü ilə Bakıda TDT-yə üzv ölkələrin qeyri-hökumət təşkilatlarının Birinci Əməkdaşlıq Forumu keçirilib. Forumda Prezident İlham Əliyevin müraciətində Türk dünyasının qlobal miqyasda artan rolu və gələcək perspektivləri xüsusi vurğulanıb. Bu forumdan sonra TDT-yə üzv ölkələrin QHT-ləri arasında əməkdaşlıq platformasının yaradılması istiqamətində mühüm addımlar atılıb. Həmin platformaya rəhbərliyin Azərbaycana həvalə olunması ölkəmizin artan nüfuzunun, təşkilati potensialının və fəal rolunun göstəricisidir: “Ötən dövr ərzində Bakıda artıq iki forum keçirilib, türk ölkələrindən olan QHT-lər arasında geniştərkibli görüşlər və müzakirələr aparılıb. Bu platforma çərçivəsində mühüm qərarlar qəbul olunur və vətəndaş cəmiyyəti institutları inteqrasiya prosesində daha fəal iştirak edir”.
Siyasi şərhçi vurğulayıb ki, Azərbaycan bu istiqamətdə yalnız çoxtərəfli platformalarla kifayətlənmir, eyni zamanda, ikitərəfli əməkdaşlıqların da inkişafına xüsusi önəm verir. Azərbaycan–Türkiyə, Azərbaycan–Özbəkistan, Azərbaycan–Qırğızıstan, Azərbaycan–Türkmənistan və Azərbaycan–Şimali Kipr QHT-ləri arasında əməkdaşlıq əlaqələri getdikcə genişlənir. “Həmçinin Azərbaycan Respublikası Qeyri-Hökumət Təşkilatlarına Dövlət Dəstəyi Agentliyi tərəfindən TDT-yə üzv ölkələrin QHT-ləri üçün birgə qrant layihələrinin həyata keçirilməsi istiqamətində təşəbbüslərin irəli sürülməsi məqsədəuyğun hesab olunur. Azərbaycan–Türkiyə xətti üzrə bu sahədə müəyyən təcrübə artıq formalaşıb və digər türk dövlətləri ilə də oxşar mexanizmlərin tətbiqi mümkündür. Azərbaycan, Özbəkistan və Qırğızıstanla yanaşı, TDT-yə üzv digər ölkələrin QHT-ləri ilə də birgə layihələrin həyata keçirilməsi türk xalqları arasında ictimai və mədəni inteqrasiyanın dərinləşməsinə xidmət edəcək. Bu, eyni zamanda, qarşılıqlı həmrəyliyin gücləndirilməsi və vətəndaş cəmiyyəti səviyyəsində əməkdaşlığın yeni mərhələyə keçməsi baxımından mühüm əhəmiyyət kəsb edir”, - deyə o diqqətə çatdırıb.
Mübariz Göyüşlü hesab edir ki, ümumilikdə TDT çərçivəsində QHT platformasının formalaşması və inkişafı Türk dünyasında inteqrasiyanın daha da dərinləşməsi üçün strateji əhəmiyyət daşıyan mühüm proses kimi qiymətləndirilə bilər.
Bölmənin digər xəbərləri
