Şamaxı, 13 aprel (AZƏRTAC). Ümummili lider Heydər Əliyevin 90 illik yubileyi münasibətilə Şamaxıda Şirvan bölgəsində fəaliyyət göstərən dini icma sədrlərinin, imam və axundların, fəal dindarların və ilahiyyatçıların iştirakı ilə keçirilən “Dövlət-din münasibətləri və maarifləndirmə işi” mövzusunda ikigünlük regional konfrans aprelin 13-də işini davam etdirmişdir.

AZƏRTAC xəbər verir ki, Dini Qurumlarla İş üzrə Dövlət Komitəsi və İslam Konfransı Gənclər Forumu Avrasiya Regional Mərkəzinin birgə təşkilatçılığı və rayon icra hakimiyyətinin dəstəyi ilə keçirilən regional konfransın ikinci iş günü plenar iclaslarla davam etdirilmiş, iştirakçılar qarşısında maraqlı məruzə və çıxışlar olmuşdur.

“Milli-mənəvi dəyərlərə baxış: tarixilik və müasirlik” mövzusunda keçirilən 1-ci plenar iclasda İslam Konfransı Gənclər Forumu Avrasiya Regional Mərkəzinin rəhbəri Elçin Əsgərov “Azərbaycanda ənənəvi İslam və xarici təsirlər” mövzusunda məruzəsində Azərbaycan xalqının islam mədəniyyətinə töhfələrindən geniş söz açmışdır. Natiq sovet imperiyasının 70 illik hakimiyyəti dövründə ənənələrin qırılmasının müşahidə olunduğunu, nəticədə xaricdə formalaşan cərəyanların Azərbaycana zidd ənənələr gətirməyə çalışdıqlarını qeyd etmişdir. Bildirmişdir ki, Azərbaycan dindarı qarşısında duran əsas vəzifələrdən biri məhz öz dini ənənələrini öyrənmək və bərpa etmək, onu zərərli xarici təsirlərdən qorumaqdır.

Daha sonra Qafqaz Universitetinin müəllimi Mehmet Rıhtım “Azərbayanda ənənvi dindarlıq”, Bakı İslam Universitetinin Zaqatala şöbəsinin müəllimi Fuad Quliyev “Şirvan bölgəsində ənənəvi dindarlığın perspektivləri”, Elnurə Əzizova “İslamda ailə modeli və müasir cəmiyyət”, Dini Qurumlarla İş üzrə Dövlət Komitəsinin şöbə müdiri Əliheydər Zülfüqarovun “Dini radikalizmin və ekstremizmin qarşısının alınmasında dini icmaların rolu” mövzusunda məruzələri maraqla qarşılanmışdır.

Kontransın”Dini icmalar: problemlər, reallıqlar və gözləntilər” mövzusunda 2-ci plenar iclasında Dini Qurumlarla İş üzrə Dövlət Komitəsi sədrinin müavini Gündüz İsmayılov dini icmaların fəaliyyətində meydana çıxan problemlərdən, icma üzvlərinin üzərlərinə düşən vəzifələrdən geniş söz açmışdır. Qeyd etmişdir ki, bir çox hallarda icmaların üzləşdikləri problemlər bilavasitə onların hətta nizamnamə ilə dolğun şəkildə tanış olmamalarından irəli gəlir.

Dini Qurumlarla İş üzrə Dövlət Komitəsinin mətbuat katibi Orxan Əliyevin “Dini icmalar və yeni media” mövzusunda məruzəsi də maraqla dinlənilmişdir. Məruzədə dini icmaların nümayəndələrinə yeni media və sosial şəbəkələr haqqında geniş məlumat verilmişdir.

“İslamda orta yol” mövzusunu əhatə edən plenar iclasda “Elm yurdu” İctimai Birliyinin sədri Elşad Mahmudovun “Mötədillik: əsasları və prinsipləri”, Bakı İslam Universitetinin Zaqatala şöbəsinin müəllimi Rafiz Manafovun “Vəhdət naminə məzhəblərarası dialoq” mövzusunda məruzələri dinlənilmişdir.

“Vətənpərvəlik və milli-mənəvi dəyərlərimiz” plenar iclası çərçivəsində Dini Araşdırmalar Mərkəzinin icraçı direktoru Natiq Rəhimovun “Milli dövlətçiliyimizin möhkəmləndirilməsində ənənəvi dindarlığın və milli-mənəvi dəyərlərimizin rolu” mövzusunda məruzəsi dinlənilmiş, Azərbaycanın Milli Qəhrəmanı Mübariz İbrahimova həsr edilmiş sənədli film nümayiş olunmuşdur.

DQİDK sədrinin müavini Gündüz İsmayılov regional konfransın əhəmiyyətini vurğulayaraq qeyd etmişdir ki, bu cür tədbirlərin keçirilməsi dövlət-din münasibətlərinin daha da yaxınlaşmasına xidmət edir. Bu gün ölkəmizdə bütün sahələrdə olduğu kimi, din sahəsində də uğurlu addımlar atılır. Bu isə öz növbəsində əsası ulu öndər Heydər Əliyev tərəfindən qoyulmuş və Prezident İlham Əliyev tərəfindən uğurla davam etdirilən siyasətin nəticəsidir.

Sonda konfrans iştirakçıları adından bəyanat qəbul edilmişdir. Bəyanatda ulu öndərimiz Heydər Əliyev tərəfindən əsası qoyulmuş dövlət-din münasibətlərinin tənzimlənməsi konsepsiyasının bu gün Prezident İlham Əliyevin rəhbərliyi altında uğurla davam etdirilməsi xüsusi qeyd edilmişdir. Bildirilmişdir ki, konfrans iştirakçıları milli-mənəvi dəyərlərimizə, tarixi-dini abidələrimizə, eləcə də dini icmaların və din xadimlərinin fəaliyyətinə göstərilən qayğını, bu sahədə həyata keçirilən tədbirləri yüksək qiymətləndirir və dəstəkləyirlər. Konfrans iştirakçıları bu baxımdan 743-cü ildə inşa edilmiş, Cənubi Qafqazın ilk məscidi olan, 1918-ci ildə xalqımıza qarşı həyata keçirilmiş soyqırımı zamanı erməni-daşnak-bolşevik hərbi birləşmələri tərəfindən əksəriyyəti uşaq, qadın və qoca olmaqla 1500 nəfərin sığınacaq tapdığı insanlarla birlikdə yandırılıb dağıdılan Şamaxı Cümə məscidinin Prezident İlham Əliyevin Sərəncamı ilə əsaslı təmir edilərək yenidən qurulmasını yüksək qiymətlndirir, bu xeyirxah əməli üçün dövlətimizin başçısına minnətdarlıqlarını bildirirlər.

Bu məscidin bərpası Azərbaycan xalqı, o cümlədən bütün dindarlar üçün təkcə ibadət evinin yenidən qurulması deyil, həm tariximizin, həm milli irsimizin, həm də milli təfəkkürümüzün qorunmasıdır.

Bəyanatda daha sonra deyilir: “Biz dindarlar din sahəsinə göstərilən qayğı ilə yanaşı, Azərbaycanın iqtisadi gücünün artırılmasına, bölgələrin sosial-iqtisadi inkişafının təmin edilməsinə və sosial problemlərin həlli istiqamətində həyata keçirilən ardıcıl tədbirlərə görə də dövlətimizin başçısına təşəkkürümüzü bildiririk.

Bölgə dindarları ölkədə dini maarifləndirmə işinin gücləndirilməsinin zəruriliyini vurğulayaraq, son vaxtlar Dini Qurumlarla İş üzrə Dövlət Komitəsinin digər müvafiq qurumlarla birgə həyata keçirdiyi tədbirləri yüksək qiymətləndirirlər. Belə yüksək səviyyəli tədbirlər təkcə dövlət-din münasibətlərinin inkişaf etdirilməsinə, dindarların maarifləndirilməsinə deyil, həmçinin ölkə dindarlarının dövlətə etimadının daha da artmasına xidmət edir”.

Bəyanatda bu sahədə Dini Qurumlarla İş üzrə Dövlət Komitəsinin dini icmalar üçün təlim kurslarını təşkil etməsi təşəbbüsünün dəstəkləndiyi və bunun ciddi nəticələr verəcəyinə əminlik ifadə olunmuşdur.