Naxçıvan gömrüyündə müasir tələblərə cavab verən standartlar tətbiq olunur - mediatur
Naxçıvan, 5 iyul, AZƏRTAC
Dövlət Gömrük Komitəsi yanında İctimai Şura üzvlərinin və media nümayəndələrinin Naxçıvan Baş Gömrük İdarəsinə səfəri təşkil edilib. Mediatur gömrük sistemində aparılan təkmilləşdirmələrlə bağlı rəsmiləşdirmə prosesində reallaşdırılan yeniliklər barədə şura üzvləri və media nümayəndələrini məlumatlandırmaq məqsədilə keçirilib.
AZƏRTAC-ın Naxçıvan bürosu xəbər verir ki, əvvəlcə baş idarənin inzibati binasında şura üzvləri və media nümayəndələri ilə görüş olub.
Naxçıvan Baş Gömrük İdarəsinin rəisi, gömrük xidməti general-mayoru Vüqar Əliyev Naxçıvan gömrüyünün tarixi barədə məlumat verdikdən sonra əsas inkişaf mərhələlərindən söz açıb. Bildirilib ki, Ulu Öndər Heydər Əliyevin Naxçıvanda Ali Məclisin Sədri işlədiyi dövrdə muxtar respublikanın iqtisadi təhlükəsizlik sisteminin formalaşdırılması, gömrük və ticarət münasibətlərinin qurulması istiqamətində kompleks tədbirlər həyata keçirilib, 1992-ci il fevralın 24-də “Naxçıvan Muxtar Respublikası Dövlət Gömrük Komitəsinin yaradılması barədə” Fərman imzalanıb. O illərdə İran ərazisindən keçməklə Azərbaycanın digər bölgələri ilə nəqliyyat əlaqəsinin qurulması və blokadada olan Naxçıvanın Türkiyə Respublikası ilə gəliş-gedişinin təmin olunması məqsədilə Ümummilli Lider Heydər Əliyevin iştirakı ilə 1992-ci il mayın 28-də “Ümid” körpüsü - Sədərək-Dilucu körpüsünün, həmin dekabrın 3-də isə Şahtaxtı-Pоldəşt körpüsünün açılış mərasimləri оlub. Qonşu Türkiyə Respublikası və İran İslam Respublikası ilə imzalanmış sazişlər, həyata keçirilən rəsmi səfərlər sayəsində xarici əlaqələrin əhatə dairəsi xeyli genişlənib.
Vüqar Əliyev qeyd edib ki, Sədərək və Culfa gömrük-sərhəd buraxılış məntəqələri 24 saatlıq iş rejimində fəaliyyət göstərir, Şahtaxtı-Poldəşt gömrük-sərhəd buraxılış məntəqəsinin isə iş vaxtı 16 saata çatdırılıb. Dövlətimizin hərtərəfli diqqət və qayğısı ilə gömrük sistemində müasir infrastruktur və möhkəm maddi-texniki baza formalaşdırılıb. Dövlət Gömrük Komitəsində aparılan struktur dəyişikliklərdən sonra Naxçıvan Baş Gömrük İdarəsinin Sədərək, Şahtaxtı, Culfa, Naxçıvan Karqo Terminalı gömrük postları formalaşdırılıb. Bu gün muxtar respublika gömrük xidmətində müasir tələblərə cavab verən standartlar tətbiq olunur. Culfa, Şahtaxtı və Sədərək gömrük postlarında quraşdırılan rentgen-nəzarət qurğuları muxtar respublikaya bütün istiqamətlərdən gələn mallara, nəqliyyat vasitələrinə və sərnişinlərə gömrük nəzarətini daha dolğun və sürətli şəkildə həyata keçirməyə imkan verir. Gömrük sərhəd buraxılış məntəqələrində minik nəqliyyat vasitələri də rentgen qurğusundan keçirilməklə yoxlanılır.
Sonra DGK Xidmət Keyfiyyətinə Nəzarət İdarəsinin rəisi Adil Muradov və Gömrük Tənzimlənməsi İdarəsinin rəisi Cəfər Quluzadə son dövrlərdə Azərbaycan gömrüyü tərəfindən rəqəmsal həllər əsasında reallaşdırılan layihələr barədə təqdimatlarla çıxış ediblər.
Qeyd edək ki, səfər çərçivəsində Dövlət Gömrük Komitəsi yanında İctimai Şura üzvləri və media nümayəndələri Naxçıvan Baş Gömrük İdarəsinin “Rəsmiləşdirmə Mərkəzi”ndə, Naxçıvan Karqo Terminalı gömrük postunda və Sədərək gömrük-sərhəd buraxılış məntəqəsində tətbiq edilən yeniliklərlə əyani şəkildə tanış olacaqlar.
Bölmənin digər xəbərləri
