MƏDƏNİYYƏT
Sankt-Peterburqda Rudolf İvanovun Naxçıvan xanları sülaləsinin tarixi haqqında kitabının təqdimat mərasimi olmuşdur
Sankt-Peterburq, 11 aprel (AZƏRTAC). Aprelin 10-da Rusiyanın şimal paytaxtında görkəmli tarixçi alim, professor Rudolf İvanovun yaradıcılıq gecəsi və “Kəlbəli xan Naxçıvanski. Onun dövrü və irsi. Tarixi oçerklər” adlı yeni kitabının təqdimat mərasimi keçirilmişdir. Tədbir “Azərbaycanın dostları cəmiyyəti-Naxçıvan” regional ictimai təşkilatı və Azərbaycanın Sankt-Peterburqdakı Baş konsulluğu tərəfindən birgə təşkil edilmişdi.
Tədbirin əvvəlində Rudolf İvanovun həyat və fəaliyyətindən bəhs edən sənədli film nümayiş etdirilmişdir. Film “Azərbaycanın dostları cəmiyyəti-Naxçıvan” regional ictimai təşkilatı tərəfindən hazırlanmışdır.
Gecənin aparıcısı, cəmiyyətin sədri İdris Qəhrəmanov həyatının 40 ilini Rusiya-Azərbaycan münasibətlərinin möhkəmlənməsinə, Naxçıvanskilər sülaləsinin həyat və fəaliyyətinin tədqiqinə həsr etmiş, Azərbaycan tarixinin yeni səhifələrini açmış Rudolf İvanovun yaradıcılığı haqqında məlumat vermişdir.
Azərbaycanın Sankt-Peterburqdakı baş konsulu Qüdsi Osmanov Azərbaycan-Rusiya dövlətlərarası münasibətlərinin möhkəmlənməsinə sanballı töhfə olan bu tədqiqatların rolundan danışaraq qeyd etmişdir ki, Rudolf İvanovun araşdırmaları xalq diplomatiyasının əyani nümunəsidir. Q.Osmanov demişdir ki, tarixin müxtəlif dövrlərində Azərbaycan xalqının Naxçıvanskilər, Topçubaşovlar və bir sıra başqa sülalələrinin nümayəndələri olan qəhrəman oğullarını məhv edərək bu xalqın iradəsini qırmağa cəhd göstərilmişdir. Lakin bu gün Azərbaycan sabit inkişaf edən güclü dövlətdir, onun müstəqilliyi dönməzdir.
Natiq qeyd etmişdir ki, “Azərbaycanın dostları cəmiyyəti -Naxçıvan” regional ictimai təşkilatı tərəfindən bu cür tədbirlər keçirilməsi Azərbaycan reallıqlarının təbliğ edilməsi, bu reallıqların Rusiya ictimaiyyətinə çatdırılması istiqamətində həyata keçirilən səmərəli və uğurlu fəaliyyətin göstəriciləridir.
Vladimir Putinin Sankt-Peterburqdakı ictimai qəbul otağının rəhbəri, Ümumrusiya Xalq Cəbhəsinin əlaqələndiricisi, Sankt-Peterburq qanunvericilik məclisinin deputatı Yelena Kiselyova Rudolf İvanovun Azərbaycan və Rusiya tarixinə dair zəngin arxiv materiallarının öyrənilməsinə verdiyi böyük töhfəni vurğulayaraq qeyd etmişdir ki, bu müəllifin dərin və obyektiv araşdırmaları hər iki xalqın mənafeyinə xidmət edir.
Tədbirdə Azərbaycan diasporunun nümayəndələri, o cümlədən həyat və fəaliyyəti Rudolf İvanovun kitablarında təsvir edilmiş bir sıra görkəmli Naxçıvan sərkərdələrinin nəslinin nümayəndələri də çıxış etmişlər. Sankt-Peterburqun tarixçiləri və alimləri öz çıxışlarında qeyd etmişlər ki, R.İvanov bu illər ərzində çox böyük iş görmüş, əvvəllər məlum olmayan nadir tarixi faktları üzə çıxarmışdır. Bu, tarixi faktların obyektiv başa düşülməsi üçün çox böyük əhəmiyyət kəsb edir. Qeyd edilmişdir ki, Rudolf İvanovun yeni kitabı bütövlükdə tarix elminə və xalqlarımıza gözəl hədiyyədir.
Rudolf İvanov tədbirdə çıxış edənlərin hamısına səmimi təşəkkürünü bildirmiş və təqdimatı keçirilən kitab üzərində işi barədə danışmışdır. O, yaradıcılıq gecəsinin təşkil olunmasına görə Azərbaycanın, Naxçıvan Muxtar Respublikasının rəhbərliyinə və “Azərbaycanın dostları cəmiyyəti - Naxçıvan” regional ictimai təşkilatına dərin təşəkkürünü bildirərək, öz araşdırmalarını bundan sonra da məmnuniyyətlə davam etdirəcəyini vurğulamışdır. Rudolf İvanov Azərbaycanın birinci xanımı Mehriban Əliyevaya təşəkkürünü bildirərək demişdir: “Mən bu böyük qadının qarşısında baş əyirəm, çünki o, özü kadr arxasında qalsa da, bu həqiqəti qiymətləndirmiş və məni dəstəkləmişdir. Azərbaycan Prezidenti İlham Əliyev məni yüksək mükafata layiq görəndə bu mükafat mənim yazıçılıq fəaliyyətimə deyil, ölkələrimiz və xalqlarımız arasında dostluğun möhkəmləndirilməsinə töhfəyə verilən qiymət idi”.
Rudolf İvanovun “Kəlbəli xan Naxçıvanski. Onun dövrü və irsi. Tarixi oçerklər” kitabına Azərbaycanın əfsanəvi Xan Naxçıvanskilər sülaləsinin banisi Kəlbəli xan Naxçıvanskiyə həsr edilmiş 11 tarixi oçerk daxil edilmişdir. Kitabda İranda Ağaməhəmməd şah Qacarın hakimiyyətdə olduğu dövrdə Kəlbəli xanın Naxçıvanın mənafelərini müdafiə etməsi, Qacarın Kəlbəli xanın Rusiya ilə əlaqə saxlamasından şübhələnərək onun gözlərini çıxartdırması və Naxçıvanın böyük sərkərdələrinin həyatı barədə çoxlarına məlum olmayan faktlar öz əksini tapmışdır.
Qeyd etmək lazımdır ki, bu kitabın nəşri Azərbaycan-Rusiya əlaqələrinin fəal tədqiqatçısı, məşhur tarixçi və yazıçı, professor Rudolf İvanovun anadan olmasının 80 illiyinə həsr edilmişdir.
Asya Hacızadə
AZƏRTAC-ın xüsusi müxbiri
Sankt-Peterburq