Seçici: 28 yaşım çox əlamətdar bir tarixlə üst-üstə düşüb
Bakı, 7 fevral, Göyçək Mahmudlu, AZƏRTAC
Fevralın 7-si mənim doğum günümdür. 28 yaşım çox əlamətdar bir tarixlə üst-üstə düşüb. Bu günü növbədənkənar prezident seçkilərində iştirak etməklə əbədiləşdirdim.
Bunu AZƏRTAC-a müsahibəsində seçkilərdə iştirak edən Əfsanə İmanova deyib.
Əslən Zəngilan rayonundan olan Əfsanə doğma ata-baba yurdunu görməyib. O, dünyaya gəlməmişdən 3 il əvvəl Zəngilan Ermənistan ordusu tərəfindən işğal olunmuşdu. Ta ki, 2020-ci il oktyabrın 20-nə qədər... 2020-ci il sentyabrın 27-də başlanan Vətən müharibəsində Əfsanənin qardaşı Zakir İmanov da iştirak edib. Ona ata-baba yurdunun düşmən tapdağından xilas edilməsi uğrunda da döyüşmək nəsib olub.
“Qardaşım Zakir Vətən müharibəsi qazisidir. O, Tərtərin Suqovuşan qəsəbəsi və Talış kəndi, o cümlədən Ağdərə, Füzuli və Zəngilan rayonları istiqamətində gedən döyüşlərdə iştirak edib. Mən qürurluyam ki, bu gün seçkilər ərazi bütövlüyü tam bərpa edilmiş Azərbaycanda keçirilir. Zəngilana köçürülən sakinlərin də məhz orada səs verdiklərini izləmək fərqli hisslərdir. Azərbaycan Ordusunun hərbi qulluqçuları bizim bu sevinci yaşamağımız üçün canlarından, qanlarından keçdilər. Fəxr edirəm ki, qardaşımın da Şanlı Zəfərdə payı var.
Ən böyük arzularımdan biri rayonumuzu görməkdir. Ümid edirəm ki, növbəti illərdə bu arzuma da çatacağam. İyirmi səkkiz yaşım isə seçkinin təntənəsində əsl bayram ab-havası ilə keçir. Bu gün mənim üçün unudulmaz bir tarixə çevrildi”, - deyə Ə.İmanova bildirib.
Bölmənin digər xəbərləri
