ŞƏFFAFLIQ TƏMİN OLUNACAQDIR
Milli Məclisə təkrar seçkilərin keçirilməsinə bir ay qalır. Gəncədəki 38 saylı Nizami (ikinci) dairə seçki komissiyasında da mayın 13-də keçiriləcək seçkilərə ciddi hazırlıq görülür. Deputatlığa namizədliyi qeydə alınmış 14 nəfərin hər birinə təbliğat üçün normal şərait yaradılmış, seçicilərin fəallığının artırılması üçün Seçki Məcəlləsinin bütün tələblərinə əməl edilmişdir. Seçkilərin şəffav və demokratik şəraitdə keçirilməsində başlıca amil olan seçici siyahılarının dəqiqləşdirilməsi ciddi nəzarətə götürülmüşdür.
Dairə seçki komissiyasının sədri İbrahim Cəfərov AZƏRTAC-ın müxbirinə demişdir ki, seçkilərin mütəşəkkil keçirilməsini təmin etmək üçün bütün lazımi imkanlardan istifadə olunur. Dairənin seçki məntəqələri sədrlərinin, katib və üzvlərinin iştirakı ilə keçirilən müşavirədə seçki günü qarşıya çıxa biləcək problemlərin həlli yolları barədə müzakirələr aparılmışdır.
