CƏMİYYƏT
Səhiyyənin cəmiyyət və dövlət həyatında mühüm sahəyə çevrilməsi ümummilli lider Heydər Əliyevin adı ilə bağlıdır
![Səhiyyənin cəmiyyət və dövlət həyatında mühüm sahəyə çevrilməsi ümummilli lider Heydər Əliyevin adı ilə bağlıdır](/files/2014/2/1200x630/14087122362409259554_1200x630.jpg)
Naxçıvan, 12 iyun (AZƏRTAC). Naxçıvan Muxtar Respublika Xəstəxanasında 15 İyun - Milli Qurtuluş Gününə həsr olunmuş tədbir keçirilmişdir.
AZƏRTAC xəbər verir ki, xəstəxananın baş həkimi Əli Ələsgərov ümummilli liderimiz Heydər Əliyevin şərəfli ömür yolundan, dövlətçilik fəaliyyətindən, Azərbaycan üçün misilsiz xidmətlərdən söz açmışdır.
Bildirilmişdir ki, səhiyyənin cəmiyyət və dövlət həyatında ən mühüm sahəyə çevrilməsi, onun inkişaf və tərəqqisi xalqımızın ümummilli lideri Heydər Əliyevin adı ilə bağlıdır.
Ulu Öndər xalqımızın təkidli tələbi ilə 1993-cü ildə yenidən siyasi hakimiyyətə qayıtdıqdan sonra digər sahələr kimi, səhiyyədə də yeni quruculuq dövrü başlanmışdır. Naxçıvanda əhalinin sağlamlığının qorunması, səhiyyə xidməti səviyyəsinin daha da yüksəldilməsi, yeni səhiyyə müəssisələrinin istifadəyə verilməsi sosial-iqtisadi siyasətin mühüm istiqamətlərindən birinə çevrilmişdir.
Bütövlükdə 1969-1999-cu illərdə Naxçıvan Muxtar Respublikasında 1156 yerlik xəstəxana, növbədə 1045 nəfər qəbul edə biləcək poliklinika və ambulatoriyalar tikilmişdir. Bütün bunlar əsası Ulu Öndər tərəfindən qoyulmuş genişmiqyaslı quruculuq və inkişaf konsepsiyasının əyani ifadəsidir.
Vurğulanmışdır ki, hazırda ölkəmizdə, eləcə də muxtar respublikada səhiyyənin inkişafı, əhalinin dünya standartlarına uyğun tibbi yardımla təmin olunması üçün genişmiqyaslı islahatlar həyata keçirilir.
Azərbaycan Respublikasının Prezidenti İlham Əliyevin 2014-cü 11 aprel tarixli Sərəncamı ilə Naxçıvan Muxtar Respublika Xəstəxanasının müasir tibbi avadanlıqla təchiz olunması məqsədilə doqquz milyon manat vəsaitin ayrılması səhiyyəyə göstərilən xüsusi diqqət və qayğının bariz nümunəsidir.
Sonra xəstəxananın həkimi Ramidə Bağırovanın “Milli Qurtuluş və Naxçıvan Muxtar Respublikasının inkişafı”, Yeni Azərbaycan Partiyası ərazi ilk təşkilatının sədri Mənsur Rzayevin “Ulu öndər Heydər Əliyev Azərbaycan xalqının xilaskarıdır”, tibb üzrə fəlsəfə doktoru Etibar Bababəylinin “Azərbaycanın özü qədər əbədi” mövzularında məruzələri dinlənilmişdir.
Tədbirdə baş həkimin müavini Ramazan Abbasov, cərrahiyyə şöbəsinin müdiri Məhərrəm Tarverdiyev, həkim-travmatoloq Aydın Qazıbəyov və başqaları 15 iyun tarixini müasir müstəqil dövlətimizin bünövrəsinin qoyulduğu gün kimi dəyərləndirmişlər.
Müstəqil Azərbaycanda qazanılan hər bir nailiyyətin Ümummilli Liderimizin müəyyənləşdirdiyi siyasi xəttin bəhrəsi olduğu vurğulanmışdır.