ŞƏKİ ŞƏHƏR SAKİNİ SEVİL İSMAYILOVANINÇIXIŞI
Bizim qarasaçlı ağsaqqalımız!
Mən Sizi qədim, gözəl Şəkimizdə salamlamaqdan sevinc və qürur duyuram.
Cənab Prezident, bu gün bizim üçün çox sevindirici, çox əlamətdar, çox da gözəl bir gündür. Ona görə ki, Siz bizim əziz qonağımızsınız. Həm də ona görə sevinir, qürur hissi keçiririk ki, oktyabr ayının 15-də Sizin ölkəmizə rəhbərlik etməyə başladığınız tarixi gündən 3 il ötür və bu gözəl gün ərəfəsində Siz biz şəkililərlə birlikdəsiniz. Bu gün ərəfəsində məhz Şəkini seçdiyinizə görə Sizi ürəkdən alqışlayır, minnətdarlığımızı bildiririk.
Cənab Prezident, Siz Şəkiyə çox gözəl və xoş niyyətlə gəlmisiniz. Şəhərimizi və ətraf rayonları fasiləsiz enerji ilə təmin etməli olan elektrik stansiyasının açılışında Sizin iştirakınız bizim üçün olduqca xoşdur. Yaxşı yadımdadır, ulu öndərimiz Heydər Əliyev çıxışlarının birində demişdir: “Çıraqlarınız sönməsin”. Budəfəki gəlişinizlə Siz Şəkini nura qərq edirsiniz, çıraqlarımızı daha da alovlandırırsınız. Siz bizim işıqlı, nurlu Prezidentimizsiniz. Nəcib və xeyirxah işi yalnız qəlbi, ürəyi gözəl insanlar görə bilir. Siz, həqiqətən, hər bir Azərbaycan vətəndaşının Prezidentisiniz. Bu barədə dediyiniz sözlərlə əməlləriniz üst-üstə düşür.
Kəndlərimizə, şəhər və rayonlarımıza səfərləriniz zamanı xalqımız Sizin sadə, insanpərvər, humanist və geniş ürək sahibi olduğunuzu qəlbən duyur. Hamı Sizin mənən zəngin, təmiz və pak insan olduğunuzu dərk edir. Bu da təsadüfi deyildir. Siz ata Heydər ocağının yetirməsi, gözəl ailənin tərbiyəsi ilə böyümüş insansınız. Atanızdan Sizə idarəçilik, inamlı və qəti qərarlar qəbul etmək, əzmkarlıq qalıbsa, ananız Zərifə xanımdan sadəlik, təvazökarlıq, humanistlik və səmimiyyət qalmışdır. Zərifə xanım gözlərə nur verirdi. Siz bu gün bütün bir regionun əhalisini nura boyadınız.
Mən Sizin bütün səfərlərinizi çox böyük diqqətlə, maraqla izləyirəm. Müşahidə edirəm ki, bir kəndə su, yol çəkiləndə, bir xəstəxana, məktəb binası tikiləndə Sizin üzünüz necə gülür, qəlbiniz fərəhdən dağa dönür. Bu yaxınlarda Xınalığa çəkilən yolun açılışında dediyiniz sözlər kimi: “Görəndə ki, insanlar sevinir, mən də sevinirəm”. Yalnız öz elini-obasını ürəkdən sevən, insanlara bağlı olan dövlət başçısı bu sözü deyə bilər. Yalnız müdrik və ağıllı adam bu sözü söyləyə bilər. Sizin təkcə ölkəmizdə deyil, xarici səfərlərdə də oturuşunuza, duruşunuza, üzünüzdə olan nura hamı məftunluqla baxır, müxtəlif dillərdə müdrik çıxışlarınızı dinləyir, Prezident vəzifəsinin Sizə necə də yaraşdığını hamı görür!
Əziz Prezidentimiz!
Azərbaycan elminə, mədəniyyətinə dahilər bəxş etmiş qədim Şəki də Sizin qayğınız və diqqətiniz sayəsində böyüyür, gözəlləşir, abadlaşır. Bu gün bu şəhərdə yaşayan insanlar elektrik enerjisi sarıdan korluq çəkmir, qaz sarıdan heç bir problemimiz yoxdur. İşsizlik sürətlə azalır, insanların üzü gülür. Bu isə olduqca xeyirxah işdir.
Möhtərəm Prezidentimiz!
Mehriban xanım xalqımızın Azərbaycan qadınına xas ən gözəl keyfiyyətləri özündə birləşdirən nəcib insandır. Mehriban xanımın təşəbbüsü, dəstəyi ilə Azərbaycanda, mən deyərdim ki, gözəl, çox müqəddəs bir layihə həyata keçirilir. “Yeniləşən Azərbaycana yeni məktəb” layihəsi çərçivəsində bizim şəhərimizdə də gözəl məktəblər tikilir. Bu gün Şəkidə yaşayan hər bir qadın, ana Mehriban xanıma böyük ümidlə baxır. Mehriban xanım isə bütün qadınlığa örnəkdir. Bütün qadınlarımız onun simasında övladının təhsilini, sağlamlığını görür, gözəl və xoşbəxt həyatını düşünür. Fürsətdən istifadə edərək, Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı Mehriban xanıma bütün şəkililər adından, analarımız, qadınlarımız adından “Çox sağ olun, qayğınızı, şəfqətinizi bu xalqdan əsirgəməyin!” deyirəm.
Çox sağ olun cənab Prezidentimiz. Siz bizə hər şey - işıq da, qaz da verdiniz, idman kompleksi də tikdirdiniz. Amma iki məsələni deməyə bilmərəm. Şəkidə dövlət universitetinin açılmasına və içməli su məsələsinin həllinə kömək etməyinizi Sizdən xahiş edirəm.
Möhtərəm cənab Prezidentimiz, Sizi Azərbaycana rəhbərlik etməyə başladığınız gün münasibətilə bütün şəkililər adından bir daha səmimiyyətlə, mehribanlıqla, sevinclə təbrik edir, bu nəhəng tikili üçün sonsuz minnətdarlığımı bildirir və bir qadın ləyaqəti, ana mərhəməti, bacı şəfqəti ilə ürəkdən deyirəm: “Yolunuz işıqlı-nurlu, ömrünüz barlı-bəhrəli, özünüz də nəvəli-nəticəli olasınız!”.
X X X
Prezident İlham Əliyev mərasimdə nitq söylədi.
Bölmənin digər xəbərləri
