ŞƏKİDƏ MƏSKUNLAŞMIŞ MƏCBURİ KÖÇKÜNLƏRLƏ GÖRÜŞ KEÇİRİLMİŞDİR
İcra hakimiyyətindən AZƏRTAC-ın müxbirinə bildirmişlər ki, görüş iştirakçıları əvvəlcə burada məskunlaşmış 48 məcburi köçkün ailəsinin mənzil-məişət şəraiti ilə yaxından tanış olmuş, onların sosial problemləri, qayğı və ehtiyacları ilə maraqlanmış, arzu və təkliflərini dinləmişlər.
Şəhər İcra Hakimiyyətinin başçısı Nazim İbrahimov görüş iştirakçılarına Prezident İlham Əliyevin Sərəncamı ilə təsdiq olunmuş”Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”nın icrası ilə bağlı nəzərdə tutulmuş tədbirlər barədə geniş məlumat vermiş, erməni təcavüzü nəticəsində öz doğma yurd-yuvalarından didərgin düşmüş soydaşlarımızın sosial-məişət problemlərinin həllinə dövlət tərəfindən daim xüsusi diqqət yetirildiyini, yeni şəhərciklərin salındığını, iş yerlərinin açıldığını və belə tədbirlərin bundan sonra da ardıcıl davam etdiriləcəyini vurğulamışdır.
Məcburi köçkünlər göstərilən diqqət və qayğıya görə dövlət başçısına dərin minnətdarlıqlarını bildirmişlər. Eyni zamanda, onları narahat edən bəzi problemlərin həllinə, o cümlədən, 20 ədəd fərdi yaşayış evinin dam örtüyünün təmirinə, yaşayış evlərinin elektrik enerjisi, su və təbii qazla təchizatının yaxşılaşdırılmasına, daxili yolların təmirinə, yeni iş yerlərinin açılmasına kömək göstərilməsini xahiş etmişlər. Şəhər rəhbərliyi bu xahişlərinin yerinə yetiriləcəyini bildirmişdir.
