ŞƏMKİRLƏ NİKOLAYEV ŞƏHƏRİNİN ZAVODSKOY RAYONUNUN QARDAŞLIĞI MÖHKƏM TƏMƏLƏ SÖYKƏNİR
AZƏRTAC xəbər verir ki, həmin sazişə uyğun olaraq, Zavodskoy Rayon İcra Hakimiyyətinin başçısı Vladimir Klimenkonun başçılıq etdiyi nümayəndə heyəti Azərbaycana gəlmişdir.
Qonaqlar ölkəmizin müstəqilliyi, suverenliyi və torpaqlarımızın müdafiəsi uğrunda canlarını qurban vermiş qəhrəmanların uyuduğu Şəhidlər xiyabanını ziyarət edərək, məzarların üzərinə gül düzmüş, “Əbədi məşəl” abidəsinin önünə əklil qoymuşlar.
Azərbaycanın paytaxtı ilə tanışlıqdan sonra Şəmkirə gələn nümayəndə heyətinin üzvləri şəhərin baş meydanında böyük hörmət və ehtiramla, duz-çörəklə qarşılanmışdır.
Rayon icra hakimiyyətinin başçısı Aslan Aslanov ilə görüşdən sonra şəhər stadionu ilə tanış olan qonaqlar “Şəmkir” futbol klubunun fəaliyyəti ilə maraqlanmışlar. Şəmkirdə idmanın inkişafı üçün yaradılmış şəraitdən razı qaldıqlarını, idman kompleksinə heyranlıqlarını söyləyən qonaqlar demişlər ki, şəmkirli dostlarımızın, rayon rəhbərliyinin UEFA-nın tələblərinə cavab verən belə bir stadion tikib istifadəyə verməsindən fəxr duyuruq. Arzu edərdik ki, 510 min əhalisi olan Nikolayev şəhərində də belə bir idman qurğusu olsun. Biz şəmkirlilərdən öyrənməliyik və bu işdə əməyi olanları alqışlayırıq.
Yaxın vaxtlarda “Şəmkir” futbol klubunun Nikolayev şəhərində yerli klubla yoldaşlıq görüşünün keçirilməsi barədə razılıq əldə olunmuşdur. Bundan məqsəd Ukraynadakı Azərbaycan diasporu nümayəndələrinin diqqətini “Şəmkir” klubuna cəlb etməkdir. Bu tədbirlər ölkəmizin Ukraynadakı səfiri Tələt Əliyevin təşəbbüsü ilə həyata keçirilir.
Oktyabrın 9-da Şəmkirdə fəaliyyət göstərən “Yeni əsr” istilikxana təsərrüfatında, un dəyirmanında, “Quşçuluq” fabrikində, Yenikənd SES-də və Şəmkir şərab zavodunda olan qonaqlar və iş adamları bu müəssisələrin fəaliyyəti ilə maraqlanmışlar. Kənd təsərrüfatı istehsalçılarının vergilərdən azad edilməsinə dair Azərbaycan Prezidentinin Sərəncamını yüksək qiymətləndirən ukraynalı qonaqlar bunun sahibkarlığın inkişafı üçün böyük əhəmiyyətini vurğulamış və demişlər ki, Ukraynada torpaq islahatına yeni başlandığı halda, Azərbaycanın ümummilli lideri Heydər Əliyevin rəhbərliyi altında Azərbaycanda torpaq islahatı uğurla həyata keçirilmiş, kəndlilərə torpaq sahələri paylanılmışdır. Hazırda Prezident İlham Əliyevin tapşırığı ilə həmin torpaqlardan səmərəli istifadə üçün lazımi şəraitin yaradılması və bu istiqamətdə aparılan uzaqgörən və məqsədyönlü siyasət xalq tərəfindən rəğbətlə qarşılanır.
Şəmkir şərab zavodunda istehsal olunan nar şirələrinin və digər məhsulların alınmasına dair Zavodskoy rayonunun rəhbərliyi ilə müqavilə imzalanmışdır. Bu ilin dekabr və gələn ilin yanvar aylarında Nikolayev şəhərinə kənd təsərrüfatı məhsullarının göndərilməsinə dair razılıq da əldə olunmuş, habelə Azərbaycan-Ukrayna birgə müəssisəsinin yaradılması qərara alınmışdır.
