Bakı, 5 fevral, Pərvanə İmanova, AZƏRTAC

Fevralın 5-də Azərbaycan Milli Elmlər Akademiyasının (AMEA) akademik Z.Bünyadov adına Şərqşünaslıq İnstitutunda bu elm müəssisəsinin və İran İslam Respublikasının Azərbaycandakı səfirliyinin Mədəniyyət Mərkəzinin birgə təşkilatçılığı ilə “İran müasir mərhələdə” mövzusunda “dəyirmi masa” keçirilib.

AZƏRTAC xəbər verir ki, tədbir İran İslam inqilabının 37-ci ildönümünə həsr olunub.

Tədbirdə Şərqşünaslıq İnstitutunun direktoru, Milli Məclisin deputatı, AMEA-nın müxbir üzvü Gövhər Baxşəliyeva rəhbərlik etdiyi elmi müəssisədə Şərq ölkələrinin, xüsusilə İranın tarixinin, ictimai-siyasi həyatının, ədəbiyyatının geniş tədqiq olunduğunu söyləyib.

Qeyd edilib ki, institutun İran tarixi və iqtisadiyyatı, İran filologiyası, mənbəşünaslıq və yazılı abidələrin tədqiqi və nəşri şöbələrində iranşünaslıqla bağlı çox dəyərli elmi-tədqiqat işləri aparılır.

G.Baxşəliyeva İran İslam Respublikası üzərindən bu yaxınlarda iqtisadi sanksiyaların götürüldüyünü qeyd edib, bunun İran dövlətinin bütün sahələrdə hərtərəfli inkişafına geniş imkanlar açacağını və ölkənin ictimai-siyasi, iqtisadi həyatına müsbət təsir göstərəcəyini vurğulayıb.

İran İslam Respublikasının Azərbaycandakı səfiri Möhsün Pakayi ölkələrimiz arasındakı dostluq münasibətlərindən söz açıb, bu əlaqələrin inkişafını yüksək qiymətləndirib. Qeyd edilib ki, İranın çətin zamanlarında Azərbaycan dövləti hər zaman ona dəstək olub, dostluq, qardaşlıq nümayiş etdirib.

Səfir bu münasibətlərin genişləndirilməsində elm adamlarının və ziyalıların rolunu xüsusi qeyd edib.

M.Pakayi İran İslam inqilabından, bu dövlətin inqilabdan sonrakı və müasir vəziyyətindən söz açıb. Diplomat inqilabdan sonrakı dövrdə ölkədə bütün sahələrdə aparılan islahatlar barədə məlumat verib.

İnstitutun İran tarixi və iqtisadiyyatı şöbəsinin müdiri Vidadi Mustafayev İran İslam inqilabından, qələbədən sonra ölkənin hərtərəfli inkişafından və burada aparılan iqtisadi islahatlardan danışıb.

İranın Azərbaycandakı səfirliyinin Mədəniyyət Mərkəzinin rəhbəri İbrahim İbrahimi ölkəsinin sülh tərəfdarı olduğunu, sanksiyaların aradan qaldırılmasının təkcə İran üçün deyil, bütün region üçün əhəmiyyətini vurğulayıb. O, Azərbaycanla bütün sahələrdə əlaqələrin bundan sonra daha da inkişaf edəcəyinə əminliyini bildirib.