Səyyar “ASAN xidmət” növbəti dəfə Abşeron rayon sakinlərinin ixtiyarındadır
Xırdalan, 15 may, Ətrabə Rzayeva, AZƏRTAC
“ASAN xidmət” Abşeron rayonunda qeydiyyatda olan sakinlərə növbəti dəfə xidmət göstərir.
AZƏRTAC xəbər verir ki, vətəndaşlar mayın 8-dən bir ay müddətində Xırdalan şəhərində Mədəniyyət Mərkəzinin qarşısında səyyar “ASAN xidmət”in fəaliyyətindən yararlana bilərlər.
Lazımi sənədləri qaydasına salmaq üçün burada foto, tibb, bank (dövlət rüsumlarının və xidmət haqlarının qəbulu) və notariat xidmətləri həyata keçirilir.
Səyyar “ASAN xidmət” vasitəsilə rayon sakinləri daşınmaz əmlakın təsvirinə, dövlət qeydiyyatına alınmış hüquqlara və onların məhdudlaşdırılmasına (yüklülüyünə) dair dövlət reyestrindən arayışları, mənzillər üzərində mülkiyyət hüquqlarının dövlət qeydiyyatına alınması barədə çıxarışları, yaşayış evləri (fərdi) üzərində mülkiyyət hüquqlarının dövlət qeydiyyatına alınması barədə çıxarışları (ilkin qeydiyyat istisna olmaqla) əldə edə bilərlər. Bununla yanaşı, burada əmək pensiyalarının təyin edilməsi, ümumvətəndaş pasportlarının verilməsi və dəyişdirilməsi, şəxsiyyət vəsiqələrinin verilməsi və dəyişdirilməsi, sürücülük vəsiqələrinin dəyişdirilməsi, vətəndaşlıq vəziyyəti aktlarının dövlət qeydiyyatı da aparılır.
Bölmənin digər xəbərləri
