Şimali Koreya lideri Kim Çen In Çində səfərdə olub YENİLƏNİB
Pekin, 28 mart, AZƏRTAC
Koreya Əmək Partiyasının Sədri, Koreya Xalq Demokratik Respublikasının Dövlət Şurasının Sədri Kim Çen In martın 25-27-də Çində səfərdə olub.
AZƏRTAC xəbər verir ki, bu barədə məlumatı Çinin rəsmi KİV-ləri martın 28-də səhər saatlarında yayıblar.
Bildirilir ki, Çin Kommunist Partiyası Mərkəzi Komitəsinin baş katibi, Çin Xalq Respublikasının Sədri Si Cinpinin dəvəti əsasında baş tutan səfər zamanı Kim Çen Inı həyat yoldaşı da müşayiət edib.
Koreya Xalq Demokratik Respublikasının lideri Kim Çen Inın rəsmi qarşılanma mərasimi olub.
Səfər zamanı Çin Kommunist Partiyasının rəhbər şəxsləri ilə keçirilən görüşündə Si Cinpin Kim Çen Inın ölkəsinə ilk səfərinin onun Çin ilə, habelə iki ölkənin hakim partiyaları arasında əlaqələrə verdiyi əhəmiyyətin göstəricisi kimi qiymətləndirib. ÇXR Sədri Çin-KXDR dostluğunun hər iki tərəf üçün dəyərli olduğunu qeyd edib.
Bu dostluğun hər iki tərəfin etdiyi ən doğru və strateji seçim olduğunu vurğulayan Si Cinpin, bunun tarixi reallığa, beynəlxalq və regional struktura söykəndiyini deyib.
Hazırda Koreya yarımadasında vəziyyətin sürətlə dəyişdiyini və bir çox vacib dəyişikliklərin yaşandığını bildirən Kim Çen In deyib ki, bu barədə Çin lideri Si Cinpini şəxsən məlumatlandırmaq istəyib.
Tərəflər yarımadakı vəziyyətlə əlaqədar fikir mübadiləsi aparıblar.
Ölkəsinin yarımadada gərginliyin azaldılması və sülh danışıqları üçün təşəbbüs irəli sürdüyünü diqqətə çatdıran Kim Çen In deyib ki, biz KXDR-in əvvəlki liderlərinin bilavasitə iradəsi ilə davamlı olaraq yarımadanın nüvə silahsızlaşdırılmasına tərəfdar olduğumuzu bildirmişik. Biz Koreyalararası əlaqələrin sülh və əməkdaşlıq münasibətlərinə keçməsi və iki Koreya lideri arasında görüşün təşkili məsələsində fikrimiz qətidir. KXDR ABŞ ilə də dialoqun qurulmasına və iki ölkənin liderləri arasında görüşün təşkilini arzulayır.
“Koreya yarımadasında nüvə silahsızlaşdırılması məsələsi, Cənubi Koreya və ABŞ-ın bizim səylərimizə xoşməramlı cavabı, sülhün təminatı üçün tərəqqipərvər və sinxron tədbirlər ilə sülh və sabitlik mühitinin yaradılması vasitəsilə həll oluna bilər”, -deyə KXDR lideri bildirib.
Kim Çen In əlavə edib ki, ölkəsi prosesin gedişində Çin ilə strateji kommunikasiyanın möhkəmləndirilməsinə, birgə səylər ilə dialoq və məsləhətləşmələr tendensiyasının qorunub saxlanılmasına ümid bəsləyir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
