Bakı, 18 dekabr, AZƏRTAC

Əsaslı səbəb olmadan həqiqi hərbi xidmətdən, Vətənin müdafiəsi uğrunda gedən döyüşlərdən yayınmaq, qaçıb gizlənmək fərarilik hesab olunur. Fərarilik təkcə bununla ölçülmür. Hesab edirəm ki, Konstitusiya ilə verilmiş hüquqdan istifadə etməyib, ölkədə keçirilən seçkilərdən bilərəkdən yayınmaq da fərarilikdir. Bunun adı həm də “seçki fərariliyidir”. Seçkilər həmişə mübarizə meydanı olub. Bu gün də elədir. Kim xalqa, seçicilərə, özünə, elektoratına inanır, güvənir proqramını, gələcək planlarını açıqlayır, qalib gəlmək üçün bütün qüvvəsini, resurslarını səfərbər edir, prezidentlik və ya deputat mandatı uğurunda mübarizəyə inamla qoşulur. Təbii ki, mübarizə meydanında qalib bir nəfər olur. Məğlublar da özündə təpər tapıb qalibi təbrik etməlidirlər. Buna məğlubiyyəti etiraf etmək mədəniyyəti də deyirlər. Təəssüf ki, özlərini xalqın başbiləni hesab edənlər seçkilər yaxınlaşanda “fərariliyə” əl atır və mübarizə meydanından qaçırlar. Belə “fərarilər” seçki şousu yaratmaq üçün xaricdəki anti-Azərbaycan qüvvələr tərəfindən idarə olunanlardır. Seçki fərariliyi qorxaqlığın, acizliyin və özünü çirkli pullara qurban verməyin əlamətidir.

Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.

O, deyib ki, prezidentliyə namizədlər seçki keçirilən zaman xalqın qarşısına çıxmalı, konsepsiyasını ortaya qoymalı, insanları inandırmalı, kütləni arxasınca aparmağı bacarmalıdırlar. 1993-cü ildən başlayaraq indiyədək prezident seçkilərində “fərarilik” edən, könül bulandıran eyni adamlar eyni partiyaya mənsublardır. Özlərini lider adlandıranlar, xarici havadarları qarşısında hesabatlar verən belələri üçün milli heysiyyət, Azərbaycanın dünyaya inteqrasiyası bir o qədər də önəmli deyil. Şəxsi ambisiyalarını xalqın taleyüklü problemlərindən üstün tutanlar, ölkədə baş verən inkişafı görmək istəməyənlər, uğurlarımızı həzm edə bilməyənlər seçki şousu yaratmaqla respublikamız haqqında beynəlxalq aləmdə mənfi rəy formalaşdırmağa can atırlar. Ancaq bütün bunlara baxmayaraq, ölkəmizdə indiyədək keçirilən prezident, parlament və bələdiyyə seçkilərinin nəticələri beynəlxalq təşkilatlar tərəfindən tanınıb. Seçki prosesini izləyən beynəlxalq təşkilatların verdikləri rəylər də bunu təsdiqləyir. Görünür, seçki fərariləri başa düşüblər ki, xalq onların arxasınca getməyəcək, səslərinə səs verən olmayacaq.

Ə.Bədəlov deyib ki, indiyədək Azərbaycanda keçirilən bütün seçkilərdə siyasi mənsubiyyətindən asılı olmayaraq hər bir namizədə bərabər səviyyədə şərait yaradılıb: “Namizədlərə seçki qərargahlarının təşkili zamanı süni əngəl olmayıb, onlar qanunla ayrılmış yerlərdə seçiciləri ilə görüşüb, maneəsiz təbliğat-təşviqat kampaniyası aparıblar. İndiyədək seçki zamanı da hər hansı bir insident baş verməyib. Bütün bunlar yerli və xarici müşahidəçilərin, həmçinin exit-polların rəylərində də öz əksini tapıb. Sözsüz ki, iki ay sonra - 7 fevral növbədənkənar prezident seçkisində də bunun şahidi olacağıq. Seçkidə iştirak etmək üçün dövlət qeydiyyatına alınmış bütün siyasi partiyalara bərabər səviyyədə imkan yaradılıb. Hazırda həmin partiyaların nümayəndələri prezidentliyə namizədliklərini irəli sürürlər. Bu, ölkədə ədalətli rəqabət mühitinin təmin edildiyinin bariz nümunəsidir”.

Siyasi şərhçi seçki fərarilərinin növbədənkənar prezident seçkilərində xalqın böyük etimad bəslədiyi, güvəndiyi və inandığı ciddi rəqiblə qarşılaşacaqlarından ehtiyatlandıqlarını, daha dəqiq desək, qorxduqlarını vurğulayıb. “Hamı 30 ilə yaxın idi deyirdi ki, kim Qarabağı işğaldan azad edəcəksə, bizim əbədi prezidentimiz olacaq. Dünya ictimaiyyəti də şahiddir ki, son 20 ildə Prezident İlham Əliyevin rəhbərliyi ilə Azərbaycan bütün sahələr üzrə sürətli inkişaf yoluna qədəm qoydu. 2020-ci ilin noyabrında Ermənistan təslim olduğunu rəsmən təsdiqlədikdən - kapitulyasiya aktını imzaladıqdan sonra hər bir vətənpərvər azərbaycanlı bundan sonra kimin arxasınca gedəcəyinə qəti qərar verdi. Prezident, Ali Baş Komandan İlham Əliyevin rəhbərliyi ilə yenilməz Ordumuzun qazandığı tarixi Qələbə nəticəsində Azərbaycanın ərazi bütövlüyü bərpa olundu. Otuz il yurd həsrəti ilə alışıb-yanan soydaşlarımız böyük sevinclə ata-baba yurdlarına qayıdırlar. Həmin ərazilərdə hər cür infrastruktura malik mənzillər, rahat, səliqəli həyət-bacalar, uşaq bağçaları, məktəblər, mədəniyyət və rabitə evləri onların yolunu gözləyir. Keçmiş məcburi köçkün soydaşlarımız doğma yurdlarına təhlükəsiz qayıtdıqlarına, rahat mənzillərdə yerləşdiklərinə və hərtərəfli dövlət qayğısı ilə əhatə olunduqlarına, ən başlıcası isə “məcburi köçkün” xəcalətindən xilas olduqlarına görə Prezident İlham Əliyevə sonsuz minnətdarlıqlarını bildirirlər. Bütün bunlardan sonra xalq kimə səs verməlidir, seçki fərarilərinə, yoxsa onlara bu xoşbəxt günləri bəxş edən Prezident İlham Əliyevə? Bütün bunlara baxmayaraq, dövlətimizin başçısı ölkədə növbədənkənar prezident seçkisi keçirilməsi üçün hər kəsə meydan açıb”, - deyə o bildirib.

Ə.Bədəlov deyib: “Növbədənkənar prezident seçkiləri əsil sınaq, mübarizə meydanıdır. Özünü “ana müxalifət”, “xeyli elektoratı olan”, “azadlıq carçısı” adlandıran partiya sədrləri niyə prezidentliyə namizəd olmaq istəmir, fərariliyi seçirlər? Bunun bir səbəbi var: Çünki bunun üçün də qabiliyyət, səviyyə, seçki mədəniyyəti, vətənpərvərlik lazımdır. Özündə güc, inam, xalqın etimadını duyanlar buyursunlar seçkiyə: bu meydan, bu da siz. Fərarilik insanlığa ləkədir”.