SOFİ LOREN ƏVVƏLKİTƏK ƏN GÖZƏL VƏ CAZİBƏDAR XANIMDIR
Sofi Loren 1934-ci ildə doğulmuşdur. 15 yaşından Neapolda keçirilən gözəllik müsabiqələrində iştirak etmişdir. Burada prodüser Karlo Pontinin diqqətini cəlb etmişdir. Ona əsil şöhrəti rejissor Vittorio De Sikanın 1954-ci ildə çəkdiyi “Neapolun qızılı” filmi gətirmişdir. Daha sonra tanınmış Amerika rejissoru Stenli Kramerin “Məğrurluq və ehtiras” filmində çəkilmiş və təkcə İtaliyanın deyil, Amerikanın da kinoulduzuna çevrilmişdir.
Tənqidçilərin fikrincə, Sofi Loren sadə italyan qadınların da, kübar xanımların da obrazlarını eyni məharətlə yaratmış, əslində, həmişə güclü şəxsiyyətləri oynamışdır. Məsələn, Kann kinofestivalının qalibi olmuş, Amerika Kino Akademiyasının “Oskar” mükafatını almış, antifaşist mövzuda çəkilən “Çoçara” filmində Çezira, “İtalyansayağı nikah” filmindəki Filumena obrazları belə şəxsiyyətlərdir. Filumena roluna görə aktrisa 1965-ci ildə Moskvada Beynəlxalq Kino Festivalının mükafatını almış, az sonra həmin rola görə “Oskar”a layiq görülmüşdür. Sofi Loren “Dünən, bu gün, sabah”, “Günəbaxanlar”, “Qeyri-adi gün”, “Roma imperiyasının süqutu”, “Arabeska”, “Sid”, “Lamançlı adam” kimi filmlərdə də çəkilmişdir.
Bölmənin digər xəbərləri
