REGİONLAR
Son illər Tovuzda 189,3 kilometr avtomobil yolu əsaslı təmir edilib
Tovuz, 15 fevral, Famil Quliyev, AZƏRTAC
Tovuz rayonunun yaşayış məntəqələrinin böyük hissəsi dağlıq ərazidə yerləşdiyindən əhali yolsuzluqdən çox əziyyət çəkirdi. Son illər Prezident İlham Əliyev Tovuz rayonunun avtomobil yollarının yenidən qurulması ilə bağlı dörd Sərəncam imzalayıb.
AZƏRTAC xəbər verir ki, bu sərəncamlara əsasən 35 yaşayış məntəqəsində 40 min insanın yaşadığı Tovuz-Qovlar-Ağbaşlar avtomobil yolunun tikintisi başa çatıb. Həmin yolun uzunluğu 51 kilometr olmaqla böyük hissəsi dağlıq ərazilərdən keçir. İndi sakinlər ən ucqar kəndlərdən belə, tez bir zamanda rayon mərkəzinə gedə bilirlər.
Yenidən qurulan avtomobil yollarından biri də 28 mindən çox sakinin yaşadığı 11 yaşayış məntəqəsini birləşdirən, uzunluğu 33,8 kilometr olan Tovuz-Hunanlar-Qaraxanlı-Düz Cırdaxan yoludur. Həmin yolun tikintisi tam başa çatmasa da, əhalinin əsas gediş-gəliş yerlərinə asfalt örtük salınıb. Bu da sakinlər tərəfindən razılıqla qarşılanıb, xüsusilə də bu yollardan daha çox istifadə edən sürücülərin sevincinə səbəb olub.
Tovuzun 11 yaşayış məntəqəsində 40 mindın çox adamın yaşadığı Qovlar-Əyyublu-İbrahimhacılı-Yanıqlı-Ağacqala—Qoçdərə-Çobansığnaq-Yoğunbulaq-Sarıtala avtomobil yolunun yenidən qurulması ilə həm əhalinin rayon mərkəzinə, həm də digər şəhər və rayonlara gediş-gəlişi asanlaşıb. 48 kilometr uzunluğu olan bu yol da uzun illər baxımsızlıq ucbatından yararsız vəziyyətə düşmüşdür. Hazırda bu kəndlərin əhalisi yetişdirdikləri kənd təsərrüfatı məhsullarını asanlıqla satışa çıxara bilirlər.
Nəhayət, 4-cü yol - 53 kilometr uzunluğu olan, 43 yaşayış məntəqəsini əhatə edən 21 min insanın istifadə etdiyi avtomobil yolu da yenidən qurularaq istifadəyə verilib.
Qeyd edək ki, son illər Tovuz rayonunda ümumilikdə 140 mindən çox rayon sakininin yaşadığı 189,3 kilometr uzunluğunda avtomobil yolu əsaslı təmir edilib.