SOSİAL SİYASƏT DAİMİ KOMİSSİYASININ İCLASINDA “DƏRMAN VASİTƏLƏRİ HAQQINDA” QANUN LAYİHƏSİ MÜZAKİRƏ OLUNMUŞDUR
Komissiyanın sədri Hadi Rəcəbli demişdir ki, “Əczaçılıq haqqında” mövcud qanun günün tələblərinə cavab vermədiyi üçün, dərman vasitələri ilə bağlı davranışların hüquqi və təşkilati əsaslarını müəyyən edəcək və bu sahədə münasibətləri tənzimləyəcək yeni qanunun hazırlanması zərurəti yaranmışdır.
Komissiya sədrinin müavini Musa Quliyev layihə ilə bağlı ətraflı məlumat vermişdir. Bildirmişdir ki, mövcud qanunvericilikdə bu sahə ilə bağlı müəyyən boşluqlar vardır. Bu qanun həmin boşluqların aradan qaldırılması, sağlamlığımızın qorunması, xəstəliklərin diaqnostikası, xəstələrin müalicəsi və reabilitasiyası məsələlərində mühüm rol oynayacaqdır. Layihədə əsas anlayışlarla yanaşı, dərman vasitələri ilə davranış sahəsində dövlət siyasətinin əsas prinsipləri, əczaçılıq fəaliyyətinin lisenziyalaşdırılması, dərman vasitələrinin idxalı, ixracı, markalanması, dövlət qeydiyyatı, əhaliyə verilməsi və digər müddəalar əksini tapmışdır.
Müzakirələr zamanı əczaşılıq fəaliyyətinə nəzarətin gücləndirilməsi, dərman vasitələrinin idxalı zamanı əlavə dəyər vergisinin azaldılması, qiymətlərin tənzimlənməsi və digər müddəaların da nəzərə alınmasının vacibliyi vurğulanmışdır. Sonda layihənin birinci oxunuş Milli Məclisin müzakirəsinə çıxarılması qərara alınmışdır.
Bölmənin digər xəbərləri
