SOYQIRIM QURBANLARININ XATİRƏSİ UNUDULMAZ VƏ MÜQƏDDƏSDİR
AZƏRBAYCAN PREZİDENTİ HEYDƏR ƏLİYEV ŞƏHİDLƏR XİYABANINI ZİYARƏT ETMİŞDİR
X1X-XX əsrlərdə erməni millətçilərinin və onların havadarlarının Azərbaycan xalqına qarşı məqsədyönlü soyqırım və deportasiya siyasəti, o cümlədən 1918-ci ilin mart qırğınları da tariximizin ağrılı-acılı səhifələrindəndir. Bu siyasət iqtisadi, siyasi, maddi və mənəvi baxımdan ağır nəticələrə səbəb olmuşdur. Əzəli Azərbaycan torpaqları təcavüzkar qonşular tərəfindən qəsb edilmiş, on minlərlə soydaşımız əzab-əziyyətlə öldürülmüş, yüz minlərlə insan doğma torpaqlarından didərgin salınmış, qiymətli maddi-mədəniyyət abidələri vəhşicəsinə məhv edilmişdir.
Xalqımız, tarix bütün bu faciələri unutmayacaq, millətimiz bunu qan yaddaşında yaşadacaq və gələcək nəsillərə çatdıracaqdır ki, onlar həmişə ayıq-sayıq olsunlar.
1998-ci ildə Prezident Heydər Əliyevin imzaladığı “Azərbaycanlıların soyqırımı haqqında” Fərmanı ilə 31 mart azərbaycanlıların soyqırımı günü kimi dövlət səviyyəsində qeyd edilir, soyqırımı qurbanlarını anma tədbirləri keçirilir, dünya ictimaiyyətinin diqqəti bu məsələyə cəlb olunur. Həmin tarixi sənəddə son iki əsrdə xalqımızın başına gətirilmiş bütün faciələrə siyasi qiymət verilmişdir.
Dövlətimizin başçısı Heydər Əliyev bu kədərli gün ərəfəsində, martın 26-da xalqımıza müraciət etmişdir. Müraciətdə deyilir ki, azərbaycanlılara qarşı soyqırımı siyasətini ifşa etmək, bütün həqiqətləri dünya ictimaiyyətinə çatdırmaq üçün Azərbaycan dövləti, ictimaiyyəti, xaricdəki Azərbaycan icmaları üzərinə böyük, məsuliyyətli vəzifələr düşür. Əsl soyqırımı haqqında həqiqətləri real tarixi faktlar əsasında, dəlillərlə müntəzəm surətdə dünya dövlətlərinə və ictimai fikrinə çatdırmaq, bu hadisələrin ilhamçılarını və təşkilatlarını bəşəriyyətə tanıtdırmaq bizim, indiki nəslin müqəddəs vəzifəsidir. Bu dəhşətli hadisələr bəşəriyyətə qarşı cinayət kimi hüquqi-siyasi qiymətini almalı, dünya dövlətləri bu prinsipial məsələdə mövqelərini yenidən dəqiqləşdirməli, erməni təbliğatı nəticəsində formalaşmış stereotiplərdən imtina etməlidirlər. Bu, soyqırımı qurbanlarının xatirəsi qarşısında bizim vətəndaşlıq borcumuzdur.
X X X
Martın 31-də Azərbaycan Respublikasının Prezidenti Heydər Əliyev ölkəmizin müstəqilliyi və ərazi bütövlüyü uğrunda canlarını qurban vermiş mərd mübarizlərin uyuduğu müqəddəs Şəhidlər xiyabanını ziyarət etdi.
Xiyabana dövlət və hökumət nümayəndələri, Milli Məclisin deputatları, xarici ölkələrin respublikamızdakı səfirləri, dini icmaların, siyasi partiyaların rəhbərləri, ictimaiyyətin nümayəndələri, şəhər sakinləri toplaşmışdılar.
Xiyabanda fəxri qarovul dəstəsi düzülmüşdü.
Azərbaycan Prezidenti Heydər Əliyev “Əbədi məşəl” abidəsinin önünə əklil qoydu, soyqırım qurbanlarının, şəhidlərin xatirəsini dərin ehtiramla yad etdi.
Müdafiə Nazirliyi hərbi orkestrinin ifasında Azərbaycanın dövlət himni əzəmətlə səsləndi.
Prezident Heydər Əliyev dövlət və hökumət nümayəndələri ilə, səfirlərlə səmimiyyətlə görüşdü. Səfirlər respublikamızın rəhbərinə bu kədərli gün münasibətilə başsağlığı verdilər.
X X X
Martın son günü xiyabana gələnlər erməni qəsbkarları tərəfindən xalqımızın başına gətirilmiş qanlı faciələri bir daha dərin hüznlə xatırladılar, şəhid məzarlarının üzərinə gül dəstələri düzdülər. Soyqırım qurbanlarının, bütün şəhidlərimizin əziz xatirəsi ehtiramla yad olundu.
X X X
Milli Məclisin sədri Murtuz Ələsgərov, baş nazir Artur Rasizadə, parlament sədrinin, baş nazirin müavinləri, nazirlər və digər rəsmi şəxslər də Şəhidlər xiyabanını ziyarət etmişlər.
Bölmənin digər xəbərləri
