STRASBURQDA ÜMUMMİLLİ LİDER HEYDƏR ƏLİYEVİN 85 İLLİK YUBİLEYİNƏ HƏSR OLUNMUŞ TƏDBİR KEÇİRİLMİŞDİR
Azərbaycanın Avropa Şurası (AŞ) yanındakı daimi nümayəndəliyinin rəhbəri səfir Arif Məmmədov AZƏRTAC-ın xüsusi müxbirinə bildirmişdir ki, mayın 7-də nümayəndəlik tərəfindən Strasburqda Avropa Parlamentləri Assosiasiyasının binasında xalqımızın ümummilli lideri Heydər Əliyevin 85 illik yubileyinə həsr olunmuş tədbir keçirilmişdir.
Tədbiri giriş sözü ilə AŞ-nin Nazirlər Komitəsinin 118-ci sessiyasında iştirak etmək üçün Strasburqa gəlmiş Azərbaycan Respublikasının xarici işlər naziri Elmar Məmmədyarov açmışdır.
“Azərbaycanın Avropa Şurası ilə əlaqələrinin qurulmasında Heydər Əliyevin rolu” mövzusunda məruzə edən nazir ulu öndərin ölkəmizin Avropa təsisatlarına, xüsusilə də Avropa Şurasına inteqrasiyası istiqamətindəki səylərindən danışmış, ölkəmizin beynəlxalq nüfuzunun gücləndirilməsi sahəsində ümummilli liderin apardığı uğurlu xarici siyasət nəticəsində əldə olunmuş nailiyyətləri diqqətə çatdırmışdır.
Tədbir boyu Heydər Əliyevin həyat və fəaliyyətinə dair videomateriallar nümayiş etdirilmişdir. Salonda açılmış və ümummilli liderə həsr olunmuş guşə böyük maraq doğurmuşdur.
Tədbirdə AŞ üzvü olan ölkələrin daimi nümayəndəlikləri, Avropa Şurasının rəhbərliyi, Azərbaycan diasporunun nümayəndələri və Strasburqda təhsil alan tələbələrimiz iştirak etmişlər.
######
Bölmənin digər xəbərləri
