TACİKİSTANIN BAŞ NAZİRİ AKİL AKİLOVUN ÇIXIŞI
Hörmətli dövlət, hökumət başçıları, nümayəndə heyətlərinin rəhbərləri!
Hörmətli cənab baş katib!
Xanımlar və cənablar!
İcazə verin, Tacikistan Respublikasının Prezidenti zati-aliləri Emoməli Rəhmonovun adından sizin hamınızı – İqtisadi Əməkdaşlıq Təşkilatının üzvü olan ölkələrin dövlət və hökumət başçılarının növbəti, 9-cu zirvə toplantısının iştirakçılarını dost Azərbaycan torpağında səmimiyyətlə salamlayım, habelə qonaqpərvərliyə və işimiz üçün gözəl şərait yaradıldığına görə Azərbaycan rəhbərliyinə və xalqına minnətdarlığımı bildirim.
Şübhə yoxdur ki, bu gün İƏT ölkələrimiz arasında regional əməkdaşlığın inkişafında mühüm yer tutur, ticarət-iqtisadi, sənaye, kənd təsərrüfatı, nəqliyyat, energetika, elmi-texniki və digər sahələrdə qarşılıqlı münasibətlərin sabitliyinə və inkişafına köməyin etibarlı və səmərəli mexanizmidir. Bununla əlaqədar, iki il ərzində görülmüş işlərə görə Təşkilatın katibliyinə, xüsusən onun baş katibi cənab Asxat Orazbaya minnətdarlıq sözlərini ifadə edim və ümidvar olduğumu bildirim ki, İƏT qarşıya qoyulmuş məqsədə çatmaq yolu ilə irəliləyişini davam etdirəcəkdir.
Bu gün, qloballaşma dövründə bizim qarşımızda, İƏT-in üzvü olan ölkələr qarşısında regional əməkdaşlığın daha da dərinləşməsinə, təşkilatımızın səmərəli fəaliyyətinin təmin olunmasına, İƏT çərçivəsində qarşılıqlı münasibətlərin keyfiyyətcə yeni səviyyəyə qaldırılmasına yönəldilmiş mühüm qərarları müzakirə və qəbul etmək kimi ciddi, məsul vəzifə durur.
Ümidvaram ki, qarşıdakı müzakirələr yığılıb qalmış problemlərin həllinə çox kömək edəcək, əməkdaşlığımızın daha da inkişafına, təşkilatımızın potensialından bütün İƏT regionunun iqtisadi tərəqqisi üçün maksimum istifadə olunmasına xidmət edəcəkdir.
Hörmətli nümayəndə heyətlərinin rəhbərləri və üzvləri!
Görüşümüzün gündəliyinin 2-ci bəndinə uyğun olaraq, Azərbaycan Respublikasının Prezidenti zati-aliləri cənab İlham Heydər oğlu Əliyevi İƏT ölkələri dövlət və hökumət başçılarının 9-cu zirvə toplantısının sədri seçilməsini təklif etmək mənim üçün böyük şərəfdir.
Hörmətli dövlət və hökumət başçıları!
Nümayəndə heyətlərinin rəhbərləri, zirvə toplantısının iştirakçıları!
Sizin alqışlarınız Azərbaycan Respublikasının yüksək beynəlxalq nüfuza malik olmasına sübutdur. Toplantımızın işinə rəhbərliyi hörmətli İlham Heydər oğlu Əliyevə verirəm. Əmin olduğumu bildirmək istəyirəm ki, Azərbaycan Respublikası Prezidentinin sədrliyi ilə Təşkilat daha böyük uğurlara nail olacaqdır.
Hörmətli İlham Heydər oğlu, icazə verin, 9-cu zirvə toplantısının sədri kimi Sizi təbrik edim, Sizə ən xoş diləklərimi bildirim və xoşbəxtlik arzulayım.
X X X
Azərbaycan Prezidenti İlham Əliyev zirvə toplantısında nitq söylədi.
Bölmənin digər xəbərləri
