TƏBİİ SƏRVƏTLƏRƏ, ƏTRAF MÜHİTƏ ZƏRƏR VURANLAR QANUN QARŞISINDA CAVAB VERƏCƏKLƏR
Ekologiya və Təbii Sərvətlər Nazirliyi tərəfindən müəyyən edilmiş pozuntularla bağlı son üç ay ərzində toplanmış bir sıra materiallar müvafiq tədbirlər görülməsi üçün Azərbaycan Respublikasının Baş Prokurorluğuna göndərilmişdir. Həmin materiallar Baş Prokurorluqda öyrənilərkən ekoloji qanun pozuntuları ilə əlaqədar bir neçə cinayət işi başlanılmışdır.
Belə ki, Xəzər dənizi sahilində Qaradağ rayonunun ərazisində qanunsuz qum daşımaqla məşğul olan “Aypara-96” firması heç bir bərpaedici iş görmədən, dəniz sahilinin böyük bir hissəsini yararsız hala salmış, əlaqədar orqanların xəbərdarlıqlarına məhəl qoymadan qanunazidd hərəkətlərini davam etdirmişdir. Prokurorluq tərəfindən fakt üzrə, Azərbaycan Respublikası CM-in 188-ci və 192-ci maddələri ilə cinayət işi başlanmış, hazırda Qaradağ Rayon Prokurorluğunda istintaq davam etdirilir.
Bundan başqa, nazirliyin əməkdaşları tərəfindən aparılan yoxlama zamanı “Binəqədineft” Neft və Qazçıxarma İdarəsinin vəzifəli şəxslərinin ətraf mühitin mühafizəsi üzrə öhdələrinə düşən vəzifələri yerinə yetirmədiyi və nəticədə müəssisənin istehsal fəaliyyəti zamanı yaranan çirkabın bir hissəsinin Xocasən gölü vasitəsilə, bir hissəsinin isə primitiv qaydada qismən 3-cü qovşaqda mexaniki təmizləmə prosesi keçdikdən sonra, qeyri-qanuni olaraq Böyükşor gölünə, son nəticədə isə Xəzər dənizinə axıdılması aşkar edilmişdir. Bununla da “Binəqədineft” NQÇİ-nin vəzifəli şəxsləri tərəfindən “Ətraf mühitin mühafizəsi haqqında”, “Yerin təki haqqında” qanunların və Su Məcəlləsinin tələbləri pozulmuşdur. Fakt üzrə Baş Prokurorluq tərəfindən Azərbaycan Respublikası CM-in 252.1-ci maddəsi ilə cinayət işi başlanmışdır.
Qazax, Yardımlı, İsmayıllı və Şamaxı meşə mühafizəsi və bərpası müəssisələrinin xidməti ərazisində Ekologiya və Təbii Sərvətlər Nazirliyi tərəfindən aparılan yoxlamalar zamanı həmin müəssisələrdə meşələrin qısa müddət ərzində qanunsuz qırılması, Şamaxı Meşə Mühafizəsi və Bərpası Müəssisəsində 27072000 manat dəyərində 32100 ədəd tingin mənimsənilməsi, həmçinin Yardımlı Meşə Mühafizəsi və Bərpası Müəssisəsində vətəndaş Aydın Ağayev tərəfindən 1,65 hektar meşə fondu torpaqlarının zəbt edilərək qanunsuz əsaslı tikinti işlərinin aparılması müəyyən edilmişdir. Materiallar Baş Prokurorluqda öyrənilmiş və göstərilən faktlar üzrə Azərbaycan Respublikası CM-in 179.2.1-ci, 179.2.2-ci, 179.2.3-cü, 188-ci, 259-cu, 308.1-ci və 313-cü maddələri ilə cinayət işləri başlanmışdır.
Cari ilin aprel ayında nazirliyin əməkdaşları tərəfindən Bakı şəhərində fəaliyyət göstərən mişar və ağac emalı sexlərində yerli meşə materiallarından istifadənin qanunauyğunluğu araşdırılarkən, “Bakı-Ət” Səhmdar Cəmiyyətinin həyətində vətəndaş S.İmanovun icarəyə götürdüyü sahədə 180,4 kubmetr həcmində 54483 yeni manat dəyərində, vətəndaş S.Rəhimovun icarəyə götürdüyü sahədə 102 kubmetr həcmində 34838 yeni manat ziyan dəyərində, fiziki şəxs Q.Həsənova məxsus ağac emalı sexində 201,5 kubmetr həcmində 79700 yeni manat dəyərində, “İlqar” firmasına məxsus ağac emalı sexində 44,4 kubmetr həcmində 14851 yeni manat dəyərində, “Ağçay-Urmiya” ltd-yə məxsus ağac emalı sexində 28,2 kubmetr həcmində 9445 yeni manat dəyərində, “Abadlıq” təmir-tikinti idarəsinə məxsus ağac emalı sexində 58 kubmetr həcmində 20495 yeni manat dəyərində və “MR-3” MMC-yə məxsus ağac emalı sexində 83,1 kubmetr həcmində 23594 yeni manatlıq qanunsuz yolla əldə edilmiş yerli meşə materialları aşkar olunmuşdur. Aşkar edilmiş faktlar üzrə Azərbaycan Respublikası Baş Prokurorluğu tərəfindən CM-in 194-cü və 259-cu maddələri ilə 10-a yaxın cinayət işi başlanmışdır.
Ekologiya və Təbii Sərvətlər Nazirliyinin əməkdaşları tərəfindən aprel ayında növbəti reyd zamanı Şəki Kommersiya Kontorunun ovçuluq və balıqçılıq klubunun xidməti ərazisində yerli və əcnəbi vətəndaşların qanunsuz ov etmələri faktı aşkar edilmişdir. Onlara Azərbaycan Respublikasının “Ovçuluq haqqında” Qanunun tələblərini pozmaları izah olunsa da, onlar nazirliyin əməkdaşlarına tabe olmamışlar. Şəki Rayon Polis Şöbəsinin əməkdaşları hadisəyə müdaxilə etdikdən sonra qanunu pozan ovçulardan 8 ədəd müxtəlif ov silahı götürülmüşdür. Fakt üzrə Azərbaycan Respublikasının Baş Prokurorluğunda CM-in 314-cü maddəsi ilə cinayət işi başlanmışdır.
Azərbaycan Respublikasının Baş Prokurorluğu və Azərbaycan Respublikasının Ekologiya və Təbii Sərvətlər Nazirliyi ölkə ictimaiyyətini bir daha əmin edir ki, xalqımızın təbii sərvətlərinə, ətraf mühitə, onun fauna və florasına yönəldilmiş hər bir qanunazidd hərəkətin qarşısı qətiyyətlə alınacaq, belə cinayətə yol verən şəxslərin vəzifəsindən, mövqeyindən və keçmiş xidmətlərindən asılı olmayaraq, qanun qarşısında cavab verməsi təmin ediləcəkdir.
Bölmənin digər xəbərləri
