SİYASƏT
TEHRANDA AZƏRBAYCAN RESPUBLİKASININ SİLAHLI QÜVVƏLƏR GÜNÜ QEYD EDİLMİŞDİR
Tehran, 25 iyun (AZƏRTAC). Azərbaycan Respublikasının İran İslam Respublikasındakı səfirliyində 26 iyun - Silahlı Qüvvələr Günü münasibətilə mərasim təşkil edilmişdir. Mərasimdə Tehranda fəaliyyət göstərən diplomatik korpusun və beynəlxalq təşkilatların təmsilçiləri, xarici ölkələrin hərbi attaşeləri, İran silahlı qüvvələrinin və ölkə ictimaiyyətinin nümayəndələri, Azərbaycan Respublikasının İrandakı rəsmi nümayəndəliklərinin rəhbərləri iştirak etmişlər.
Əvvəlcə ümummilli lider Heydər Əliyevin səfirlikdəki büstü önünə əklil qoyulmuş, əziz xatirəsi ehtiramla yad edilmişdir.
Mərasimi giriş sözü ilə açan Azərbaycanın Tehrandakı hərbi attaşesi, polkovnik Mehman Süleymanov ölkəmizdə həyata keçirilən ordu quruculuğundan bəhs etmişdir. Azərbaycan ordusunun beynəlxalq standartlara uyğun formalaşdığını diqqətə çatdıran M.Süleymanov qeyd etmişdir ki, ordumuzun inkişafı ümummilli lider Heydər Əliyevin adı ilə bağlıdır. Bu siyasəti Prezident İlham Əliyev uğurla davam etdirir.
Ermənistan-Azərbaycan, Dağlıq Qarabağ münaqişəsinin yaranmasından və acı nəticələrindən danışan natiq, Azərbaycan torpaqlarının bir qisminin hələ də təcavüzkar Ermənistan tərəfindən işğal altında saxlanıldığını bildirərək qeyd etmişdir ki, Azərbaycan ordusu Ali Baş Komandan İlham Əliyevin rəhbərliyi ilə hər an ölkənin ərazi bütövlüyünü bərpa etməyə hazırdır və buna qadirdir.
Mərasim iştirakçılarına Heydər Əliyev Fondunun nəşr etdirdiyi Azərbaycan həqiqətlərinə dair nəşrlər, ordu quruculuğuna aid müxtəlif dillərdə yazılmış məlumat paylanmış, Azərbaycan ordusunun inkişafını əks etdirən film nümayiş olunmuşdur.
Sonda Tehranda diplomatik fəaliyyət müddəti başa çatan bəzi xarici ölkələrin hərbi attaşelərinə və onların ailə üzvlərinə Azərbaycanın mədəniyyət nümunələrindən hədiyyələr verilmiş, bayram süfrəsi açılmışdır.
Sabir Şahtaxtı
AZƏRTAC-ın xüsusi müxbiri
Tehran