TƏHSİL NAZİRLİYİNDƏ ASİYA İNKİŞAF BANKININ NÜMAYƏNDƏSİ İLƏ GÖRÜŞ OLMUŞDUR
Nazirlikdən AZƏRTAC-a bildirmişlər ki, görüşdə V. Kubitski “Erkən yaş dövründə uşaqların inkişafı” layihəsi çərçivəsində uğurlu əməkdaşlığı nəzərə alaraq, AİB-in ölkəmizdə həyata keçirmək istədiyi yeni layihə barədə məlumat vermişdir.
Qeyd olunmuşdur ki, yeni layihənin ilk komponenti informasiya kommunikasiya texnologiyalarının (İKT) tətbiqi ilə bağlıdır.
Qonaq, bu komponentin ölkəmizdə həyata keçirilən İKT proqramına yardım məqsədi ilə təklif edildiyini, buna əsasən, müəllimlərə İKT sahəsində müvafiq bacarıqların aşılanmasının, elektron təlim materiallarının hazırlanması üzrə mərkəzin yaradılmasının, habelə, məktəblərin lazımi materiallarla təmin edilməsinin nəzərdə tutulduğunu bildirmişdir.
Digər komponentin texniki peşə təhsilini əhatə etdiyini bildirən V.Kubitski nəzərə çarpdırmışdır ki, ölkəmizə səfəri çərçivəsində nazirliyin müvafiq şöbələrində görüşlər keçirmiş, bir sıra texniki peşə məktəblərinin vəziyyəti ilə tanış olmuşdur.
O, qeyd olunan məsələlər barədə memorandum layihəsini də təqdim etmiş, sənəddə kredit layihəsinin işlənməsi üçün qrant təklifinin əks olunduğunu söyləmişdir.
Təhsil naziri Misir Mərdanov hər iki komponentin ölkəmizin təhsil sistemi üçün əhəmiyyətini vurğulamışdır.
Bölmənin digər xəbərləri
