SİYASƏT
TƏHSİL NAZİRLİYİNDƏ NÖVBƏTİ QRANT LAYİHƏLƏRİ İMZALANMIŞDIR
Yaponiya parlamenti Müşavirlər palatası sədrinin müavini Şoci Motookanın başçılığı ilə nümayəndə heyətinin Azərbaycan Milli Məclisi sədrinin müavini Ziyafət Əsgərovun iştirak etdikləri mərasimi açan təhsil naziri Misir Mərdanov qonaqları salamlayaraq demişdir ki, Azərbaycan-Yaponiya əlaqələri möhtərəm Prezidentimiz Heydər Əliyevin dost ölkəyə 1998-ci il səfərindən sonra daha da sürətlə inkişaf etmişdir. Məhz bu səfərdən sonra Yaponiya hökuməti Azərbaycanın sosial-iqtisadi həyatının bir çox sahələrinə, o cümlədən təhsilinə də diqqət yetirməyə başlamışdır. Sahənin inkişafına yönəlmiş bir sıra layihələr, xüsusilə “Ot kökləri və insan təhlükəsizliyi” proqramı çərçivəsində layihələr həyata keçirilir. Biz bu qayğını yüksək qiymətləndiririk.
Nazir demişdir ki, yalnız məktəb tikintisi və təmiri ilə əlaqədar “Ot kökləri” Proqramı çərçivəsində ölkəmizdə 32 layihə reallaşdırılır. Bu məqsədlə 2 milyondan çox ABŞ dolları məbləğində vəsait xərclənib və xərclənməkdədir. Təkcə bu il həmin proqram çərçivəsində 14 məktəb binasının tikilməsi və əsaslı təmiri nəzərdə tutulmuşdur. Bu gün isə daha üç müqavilə imzalanacaqdır. Onlardan ikisi bilavasitə məktəblə bağlıdır.
Yaponiyanın ölkəmizdəki səfiri Toşiyuki Fucivara qeyd etmişdir ki, Yaponiya Parlamenti Müşavirlər Palatası nümayəndə heyətinin Azərbaycana səfəri ölkələrimiz arasında iqtisadi əməkdaşlığın inkişafına geniş imkanlar açacaqdır. Ümumiyyətlə, Azərbaycan üçün yardım proqramlarımızda təhsil sahəsi üstün yer tutur.
Sonra Toşiyuki Fucivara Azərbaycan Demokratik Gənclər və Tələbələr Təşkilatının sədri Asif Əsgərovla “Məktəb avadanlığının təkmilləşdirilməsi”, Göyçay su-kanalizasiya şəbəkə və qurğularının istismarı sahəsinin şöbə rəisi İsa İsayevlə “Göyçay şəhərində su təchizatının yaxşılaşdırılması”, Bakıxanov qəsəbəsindəki orta məktəbin direktoru Rasim Muradovla “Bakıxanov qəsəbəsində orta məktəb binasının tikintisi” layihələrini imzalamışlar.
Müqavilələri həmçinin şahid kimi Yaponiya Müşavirlər Palatası sədrinin müavini Şoci Motooka da imzalamışdır.
Layihələrin ümumi dəyəri 200 min ABŞ dollarından artıqdır.
İmzalanma mərasimindən sonra Şoci Motooka, Müşavirlər Palatası Qaydalar və İnzibati İşlər Komitəsinin sədri Hideki Miyazaki, Azərbaycan Respublikası Milli Məclisi sədrinin müavini Ziyafət Əsgərov çıxış etmiş, imzalanmış sənədlərin əhəmiyyətini vurğulamışlar.
Kütləvi informasiya vasitələri nümayəndələrinin suallarına cavab verilmişdir.