Bakı, 13 yanvar (AZƏRTAC). Niyazinin Ev-Muzeyində Azərbaycan Dövlət Musiqi Mədəniyyəti Muzeyi nəzdindəki klassik musiqi həvəskarları klubunun növbəti yığıncağı olmuşdur. Bu dəfə iştirakçıların arzusu ilə onların görüşünə respublikanın xalq artisti, Qara Qarayev adına Azərbaycan Dövlət kamera orkestrinin və Dövlət gənclər simfonik orkestrinin bədii rəhbəri və baş dirijoru Teymur Göyçayev gəlmişdi.

Musiqi Mədəniyyəti Muzeyinin direktoru, sənətşünaslıq namizədi, əməkdar mədəniyyət işçisi Alla Bayramova və Qara Qarayev adına Azərbaycan Dövlət kamera orkestrinin və Dövlət gənclər simfonik orkestrinin direktoru Nazilə Yaqubova görüşdə çıxış edərək bildirmişlər ki, dirijor, pedaqoq, aranjimançı Teymur Göyçayev təkcə Azərbaycanda deyil, ölkəmizin hüdudlarından kənarda da tanınır. O, on ildən çoxdur ki, Qara Qarayev adına kamera orkestrinə rəhbərlik edir. Onun pedaqoq kimi fəaliyyəti yüksək dəyərləndirilir. T.Göyçayev altı yaşlı uşaqlardan gələcəyin musiqiçilərini yetişdirir. Həmin uşaqlar yaxşı təhsil alaraq böyüyür və orkestrlərdə işləməyə gedirlər. Bu, hər dəfə Teymur Göyçayevin narahatlığına səbəb olsa da, o, yeni orkestr yarada bilir.

Teymur Göyçayev onu narahat edən məsələyə toxunaraq deyir ki, ölkəmizdə skripka, violonçel, faqot sinifləri üzrə müəllimlər azdır. Ustad dərsləri üçün mütləq pedaqoqlar dəvət etməliyik. T.Göyçayev qastrol səfərlərində musiqimizin hamını necə heyran etdiyini xatırlayır: “Həyatımda ən böyük hadisə Dövlət gənclər simfonik orkestrinin yaradılmasıdır. Mənim üçün ən başlıcası uşaqlarla işləməkdir. Hər şey isə Mstislav Rostropoviçin ölkəmizdə uşaq simfonik orkestri yaradılması barədə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban xanım Əliyevaya müraciətindən sonra başlandı. Müxtəlif məktəblərdə baxışa 150 uşaq dəvət olundu, onlardan 50-si seçildi və indi 20 uşaq işləyir.

Orkestr bir çox ölkələrdə çıxış etmiş və hər yerdə yüksək dərəcədə qiymətləndirilmişdir. Teymur Göyçayev hesab edir ki, gələcək onlarındır, çünki onlar istedadlıdırlar və əməksevərdirlər.

Əgər musiqiçi olmasaydınız, hansı sənəti seçərdiniz sualına maestro fikirləşmədən cavab vermişdir ki, - heç birini. Bəlkə də uşaq bağçasında dayə işləyərdim. Çünki orada uşaqlar vardır.

Görüşdən sonra Dövlət gənclər simfonik orkestrinin ifasında Azərbaycan və xarici ölkə klassiklərinin əsərləri səslənmişdir.