Vitse-prezident: Venesuela hökuməti uğurlu inkişaf üçün sosial, siyasi, iqtisadi tədbirlər planı hazırlayıb
Bakı, 28 may, AZƏRTAC
Hazırkı hökumət tərəfindən Venesuelanın bundan sonra da uğurlu inkişaf yolu keçməsini hədəfləyən sosial, siyasi, iqtisadi tədbirlər planı hazırlanıb.
AZƏRTAC xəbər verir ki, bu sözləri Venesuelanın vitse-prezidenti xanım Delsi Rodriqes prezident seçkiləri ilə əlaqədar müxtəlif ölkələrdən 500 nəfərin iştirak etdiyi onlayn mətbuat konfransında deyib.
Venesuelanın imperializmə qarşı göstərdiyi əzmdən danışan vitse-prezident, dünyada bütün xalqlara eyni dərəcədə azadlıq verilməsinin əhəmiyyətini vurğulayıb, Venesuela xalqının öz azadlığı və müstəqilliyi uğrunda hər zaman mübarizə aparacağını bildirib. Ölkədə 25-ci dəfə keçiriləcək demokratik seçkilərin bu azadlıq mübarizəsinin ən böyük göstəricisi olduğu diqqətə çatdırılıb.
Videokonfransda Venesuelanın Azərbaycandakı səfiri Kristofer Alberto Martinez Berroteranın dəvəti ilə Azərbaycanın yerli media nümayəndələri də iştirak edib.
Qeyd edək ki, Venesuelada prezident seçkiləri 28 iyulda keçiriləcək. Nikolas Maduro üçüncü dəfədir ölkə prezidentliyinə namizədliyini irəli sürüb. Venesuela Konstitusiyasına görə, prezidentliyə və digər seçkili vəzifələrə təkrar seçilməyə məhdudiyyət qoyulmur.
Bölmənin digər xəbərləri
