Dördqat dünya çempionu: Rafael Ağayevlə eyni pillədə olmaq fəxrdir
Bakı, 28 may, AZƏRTAC
Yarış mənim üçün möhtəşəm alındı.
Bu sözləri AZƏRTAC-a açıqlamasında Yaponiyanın Kobe şəhərində təşkil olunan dünya çempionatında iki qızıl medal qazanmış Azərbaycan paraatleti Lamiyə Vəliyeva deyib.
O, Azərbaycan bayrağını beynəlxalq arenada dalğalandırdığı üçün xoşbəxt olduğunu bildirib: “Yarışa ciddi hazırlaşmışdım. Məşqlərdə hiss edirdim ki, dünya çempionu olacağam. Özümə çox inanırdım. Qarşıda “Paris-2024” Yay Olimpiya Oyunları var. Həmin mötəbər turnirə də ciddi şəkildə hazırlaşaraq Vətənimi layiqincə təmsil edəcəyəm”.
Dördqat dünya çempionluğu ilə karateçi Rafael Ağayevin uğuruna bir addım da yaxınlaşan L.Vəliyeva bununla bağlı fikirlərini bölüşüb: “Düzünü desəm, idmançılarla belə rəqabət aparmağı sevmirəm. Lakin Rafael Ağayev kimi şəxslə ilə bir pillədə olmaq fəxrdir”.
22 yaşlı paraatlet, həmçinin bu göstərici ilə Azərbaycanın müstəqillik illərində Olimpiya və Paralimpiya Oyunlarında iştirak etmiş idmançıları arasında Rafael Ağayevdən (karate üzrə beşqat dünya çempionu) sonra üç dəfədən çox dünya çempionu olan növbəti idmançı adına yiyələnib.
Xatırladaq ki, Lamiyə Vəliyeva (T13) 100 metr və 400 metr məsafəyə qaçışda iki qızıl medal qazanıb.
Bölmənin digər xəbərləri
