Müstəqillik Günü və Silahlı Qüvvələr Günü münasibətilə Vyanada rəsmi qəbul keçirilib
Vyana, 28 may, AZƏRTAC
Azərbaycanın Avstriyadakı səfirliyində 28 May – Respublika Günü və 26 İyun - Azərbaycan Respublikası Silahlı Qüvvələri Günü münasibətilə rəsmi qəbul keçirilib.
AZƏRTAC xəbər verir ki, tədbirdə Avstriyanın dövlət və hökumət rəsmiləri, parlament üzvləri, Vyanada akkreditə olunmuş diplomatik korpusun, BMT bölməsinin və digər beynəlxalq təşkilatların təmsilçiləri, Azərbaycanın Avstriyadakı fəxri konsulları, Avstriya işgüzar dairələrinin nümayəndələri, bu ölkədə yaşayan soydaşlarımız iştirak ediblər.
Öncə Azərbaycan və Avstriyanın Dövlət himnləri səsləndirilib.
Tədbiri açan Azərbaycanın Avstriyadakı səfiri Rövşən Sadıqbəyli Azərbaycanın keçdiyi müstəqillik və inkişaf yoluna nəzər salıb, ölkəmizin müstəqilliyi və ərazi bütövlüyü uğrunda mübarizə aparan soydaşlarımızın rəşadət və fədakarlığının ehtiramla yad olunduğunu bildirib.
Qeyd edilib ki, 106 il əvvəl İstiqlal Bəyannaməsi ilə müstəqilliyi elan olunan və müsəlman Şərqində ilk demokratik respublika olan Azərbaycan Xalq Cümhuriyyəti qısa ömür sürsə də, təkcə Azərbaycanın deyil, bütün regionun tarixində mühüm iz qoyub. Cümhuriyyətin siyasəti bir çox cəhətdən öz dövrünə görə qabaqcıl xarakterə malik idi. Ölkənin bütün vətəndaşlarına bərabər hüquqlar verməklə irqi, etnik, dini və sosial bərabərlik yaradıldı, Şərqdə ilk dəfə qadınlara səsvermə hüququ verildi, qəbul edilən qanun və qərarlar demokratik hüquqi dövlətin yaranmasına yönəldi. Eyni zamanda, Azərbaycan dilinin dövlət dili elan edilməsi, üçrəngli dövlət bayrağının və himninin qəbulu, müasir teatr və opera teatrının yaradılması, milli valyutanın dövriyyəyə buraxılması dövlət quruculuğu prosesində mühüm mərhələlər idi. Təəssüflər olsun ki, Azərbaycan Xalq Cümhuriyyəti cəmi 23 ay yaşadı və 1920-ci ilin aprelində öz fəaliyyətini dayandırdı. Lakin onun idealları, dəyərləri və ənənələri azərbaycanlıların sonrakı nəsillərinin qəlbində və şüurunda yaşamağa davam etdi.
R. Sadıqbəyli bildirib ki, bu gün Azərbaycan Respublikası müstəqil, suveren və demokratik ölkə kimi Azərbaycan Xalq Cümhuriyyətinin istək və ideallarını reallığa çevirir. Məhz 1993-cü ildə Ümummilli Lider Heydər Əliyevin hakimiyyətə qayıdışı Azərbaycanın müqəddəratında dönüş nöqtəsi oldu. Son üç onillikdə Azərbaycan öz inkişaf yolunda böyük irəliləyiş əldə edib və bu gün praqmatik daxili və xarici siyasət yürüdən Prezident İlham Əliyevin rəhbərliyi ilə milli maraqlara söykənən siyasətlə özünün növbəti inkişaf mərhələsindədir.
Bu gün Azərbaycan çoxşaxəli iqtisadiyyatı, siyasi sistemi, zəngin mədəni dəyərləri, dini müxtəlifliyi və tolerantlığı, qürurlu tarixi keçmişi ilə tarixində heç vaxt olmadığı qədər güclüdür. Azərbaycan regionun ən böyük iqtisadiyyatıdır və öz coğrafiyasında və beynəlxalq arenada mühüm rol oynayır. Azərbaycan Xəzər dənizi regionunu beynəlxalq əməkdaşlıq üçün açan, Avropanın və daha geniş regional əlaqə xəritəsini dəyişdirən Cənub Qaz Dəhlizi və Şərq-Qərb və Şimal-Cənub nəqliyyat dəhlizləri də daxil olmaqla iri enerji və nəqliyyat əlaqələri layihələrinin təşəbbüskarı və mühüm icraçısıdır.
Diqqətə çatdırılıb ki, yekdil qərarla COP29-a ev sahibliyi edən ölkə seçilmək beynəlxalq ictimaiyyətin Azərbaycana və xüsusilə yaşıl enerji sahəsində görülən işlərə hörmət əlamətidir. Eyni zamanda, Azərbaycan öz regionunda və onun hüdudlarından kənarda təhlükəsizliyi təmin edən ölkəyə çevrilib və dövlətlərin beynəlxalq səviyyədə tanınmış sərhədləri daxilində suverenliyinə və ərazi bütövlüyünə qeyd-şərtsiz hörmətlə beynəlxalq hüquqa əsaslanan nizamın sadiq tərəfdarıdır.
Səfir qeyd edib ki, rəsmi mərasimdə həm də bu gün regionun ən güclü orduları sırasında yer alan, Azərbaycan Respublikasının ərazi bütövlüyünün və birliyinin bərpasında həlledici rol oynayan Azərbaycan Silahlı Qüvvələri günü də bayram edilir. Cənubi Qafqazda onilliklərlə davam edən münaqişələrdən sonra bu il Azərbaycanın milli sərhədləri üzərində suverenliyinin böyük qayıdışı və bərpası regionda sülhə, təhlükəsizliyə və firavanlığa yol açır.
Avstriya Xarici İşlər Nazirliyində idarə rəisi Qerhard Sayller çıxışında Azərbaycan və Avstriya arasında ikitərəfli əlaqələrin inkişaf etdiyini, yüksək səviyyəli səfərlərin mütəmadi şəkildə həyata keçirildiyini diqqətə çatdırıb. Qeyd edib ki, iki ölkənin şirkətləri arasında əlaqələrin möhkəmlənməsi, ixracatın artımı, birbaşa aviareyslərin mövcudluğu gələcəkdə müxtəlif sahələrdə əlaqələrin dərinləşməsinə töhfə verəcək. Eləcə də regionun mövcud potensialının dəyərləndirilməsində Azərbaycanın rolu getdikcə artmaqdadır.
Avstriya rəsmisi çıxışında Azərbaycanı COP29-a ev sahibliyi il əlaqədar təbriklərini çatdırıb. Qeyd edib ki, bu tədbir sayəsində iqlim dəyişiklərinə yeni baxışlar və yanaşmalar müzakirə olunacaq, Azərbaycan geniş müzakirələrin keçirildiyi mühüm bir məkana çevriləcək.
Çıxışlardan sonra Avstriyada yaşayan azərbaycanlı musiqiçi Fərid Feyzullayevin rəhbərlik etdiyi kvartet Azərbaycan və Avropa bəstəkarlarının əsərlərindən ibarət musiqili proqram ilə çıxış edib.
Konsertdən sonra tədbir iştirakçılarına ziyafət verilib. Dövlət Turizm Agentliyinin dəstəyi ilə milli kulinariyamızın dadlı təamları qonaqlara təqdim edilib. Yeməkləri dadmaqla yanaşı, ətraflı məlumat əldə edən qonaqlar ölkənin qastronomiya və şərabçılıq turizmi marşrutları ilə də tanış olublar.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
