Tokio sakinləri üçün “ev rejimi həftəsi” başlayıb
Tokio, 25 aprel, AZƏRTAC
Tokio paytaxt hökuməti koronovirusun yayılmasının qarşısını almaq məqsədilə sakinləri aprelin 25-dən mayın 6-dək evdə qalmağa çağırıb.
AZƏRTAC paytaxt hökumətinin mətbuat xidmətinə istinadla xəbər verir ki, bir neçə bayramı özündə birləşdirəcək bu 12 gün “ev rejimi həftəsi” adlanacaq.
Mətbuat qarşısında çıxış edən Tokionun qubernatoru xanım Koike Yuriko deyib ki, bu dövr insanlar arasında təması 80 faizədək azaltmaq üçün əsas mərhələ olacaq. Bu vəzifə Yaponiya hökuməti tərəfindən irəli sürülüb. Qubernator, həmçinin deyib ki, insanların davranışı iki həftə sonra özünü koronovirus infeksiyasının yayılma miqdarında göstərəcək.
Paytaxt hökumətinin rəsmi nümayəndələrinin bildirdiyinə görə, Tokionun mərkəzi hissəsində yerləşən ticarət mərkəzlərində insanların sayı azalsa da, ətraf rayonlarda bu o qədər də hiss olunmur.
Paytaxt hökuməti istirahət və bayram günlərində əsas ticarət küçələrində yerləşən mağazaların işləməməsi üçün onlara təqribən 37 min dollar əvəzsiz maliyyə yardımı ödəniləcəyini bildirib.
Bir çox mağazaların sahiblərinin həmin günlər işləməyəcəkləri barədə artıq müraciət etdikləri də qeyd edilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
