TQDK QABİLİYYƏT İMTAHANI KOMİSSİYALARI YARATMIŞDIR
Tələbə Qəbulu üzrə Dövlət Komissiyasından AZƏRTAC-a bildirmişlər ki, qurum 2008/2009-cu tədris ili üçün Azərbaycan Dövlət Mədəniyyət və İncəsənət Universitetinin Teatr, kino və xoreoqrafiya sənəti istiqamətinin xüsusi qabiliyyət tələb edən “Aktyorluq sənəti” və “Rejissorluq” ixtisaslarına abituriyentlərin yararlılığının yoxlanması məqsədi ilə Qabiliyyət İmtahanı Komissiyaları (QİK) təşkil etmişdir.
Mayın 31-dək komissiyalar adı çəkilən ixtisaslar üzrə təhsil almaq arzusunda olan abituriyentlərin müvafiq ixtisaslara yararlılığını yoxlayacaq, yoxlamadan müvəffəqiyyətlə keçənlərin qeydiyyata alınmasını təmin edəcəklər.
Regionlarda yaşayan abituriyentlərin rahatlığını təmin etmək məqsədi ilə QİK ekspertləri respublikanın bölgələrinə birgünlük ezamiyyətə göndəriləcəklər. Beləliklə, bölgələrdə yaşayan abituriyentlər Bakıya gəlmədən qabiliyyət imtahanına qeydiyyata düşmək imkanı əldə edəcəklər.
Naxçıvan şəhərində Teatr, kino və xoreoqrafiya sənəti istiqamətinin “Rejissorluq” və “Aktyor sənəti” ixtisasları üzrə QİK may ayının 12-də saat 11:00-dan 17:00-dək Naxçıvan Musiqili Dram Teatrında fəaliyyət göstərəcəkdir.
QİK-ə gələrkən abituriyentlər aşağıdakı sənədləri gətirməlidirlər:
şəxsiyyəti təsdiq edən sənəd; Sənəd Qəbulu Komissiyaları tərəfindən təsdiq olunmuş “Abituriyentin ərizəsi”; qəbul imtahanlarında iştirak etmək üçün TQDK-nın “Ödəmə kartı”; 3x4 sm ölçüdə 1 ədəd rəngli fotoşəkil.
QİK ekspertlərinin digər bölgələrə ezamiyyəti barədə TQDK-nın internet saytında məlumat veriləcəkdir.
Bölmənin digər xəbərləri
