Tripolidə hava hücumu nəticəsində ən azı 40 nəfər ölüb
Bakı, 3 iyul, AZƏRTAC
Liviyanın paytaxtı Tripolidə Afrikadan olan miqrantların toplaşdığı əraziyə hava hücumu nəticəsində ən azı 40 nəfərin öldüyü, 80 qaçqının isə yaralandığı bildirilir.
AZƏRTAC Reuters agentliyinə istinadla xəbər verir ki, bu məlumatı Liviyanın təcili tibbi yardım xidmətinin sözçüsü Malek Mersek yayıb. Onun sözlərinə görə, xəstəxanalara çatdırılan yaralıların bir neçəsinin vəziyyəti ağırdır.
Hava zərbələrinin üsyançı general Xəlifə Həttarın nəzarətində olan hərbi təyyarələr tərəfindən endirildiyi ehtimal olunur. Bu silahlı qoşun üç ay əvvəl də beynəlxalq ictimaiyyət tərəfindən tanınan hökumətin yerləşdiyi Tripoliyə qurudan və havandan ağır zərbələr vurmuşdu.
Liviya afrikalı miqrantların Avropa ölkələrinə yollanması üçün ən böyük toplama məntəqəsidir. Burada minlərlə qaçqın ağır şəraitdə yaşayır. Tripolinin şərqində yerləşən Tajorada Liviyanın qanuni hakimiyyətinin nəzarətində olan bir neçə qoşun hissələri dislokasiya edilib. Hava zərbələrinin də əsas hədəfinin bu ərazi olduğu bildirilir.
General Xəlifə Həttarın Liviya Azadlıq Ordusu isə bildirib ki, hava hücumları ilə heç bir əlaqəsi yoxdur.
Bölmənin digər xəbərləri
