TÜRK İSLAMCILARIN ALMANİYADA HƏBS OLUNMUŞ LİDERİ ANKARAYA TƏHVİL VERİLMİŞDİR
Türkiyənin ədalət məhkəməsi beş ildən artıq idi ki, ölkə rəhbərliyinə qarşı terror aktlarının təşkilində təqsirləndirilən Qaplanın təhvil verilməsini Almaniyadan tələb edirdi. 1998-ci ildə iqtidara müharibə elan etmiş “Xilafət dövləti”nin başçısı Türkiyə Cümhuriyyətinin yaranmasının 75-ci ildönümü qeyd olunarkən Atatürkün mavzoleyini ziyarətə gələn Türkiyə rəhbərlərini içərisinə partladıcı qoyulmuş yüngülmotorlu təyyarənin köməyi ilə məhv etmək fikrində idi. Sui-qəsdin üstü açıldıqdan sonra Qaplan Almaniyaya qaçmışdı. Bütün bu müddət ərzində Türkiyənin hüquq mühafizə orqanları onun təhvil verilməsinə çalışmışlar.
Bu terror aktı ilə əlaqədar iş üzrə 21 nəfər - təməlçi “Anadolu federativ islam dövləti” təşkilatının üzvləri həbs olunmuşdur. On nəfərin təqsiri sübuta yetirilmiş və onlar müxtəlif müddətlərə həbs cəzasına məhkum edilmişlər.
