TÜRKİYƏ 2005-Cİ İLDƏ ÖZÜNÜ DAHA FƏAL REKLAM EDƏCƏK
Mədəniyyət və Turizm Nazirliyi özəl turizm sektorunun nümayəndələri ilə birgə bütün sərgilərdə iştirak edəcəyini bildirmişdir. Sərgilər zamanı əcnəbi turistlərə və turizm şirkətlərinə Türkiyədəki mövcud istirahət imkanları barədə ətraflı məlumat verilməsi üçün bütün vasitələrdən istifadə olunacaqdır.
Dünyanın bir çox ölkələrindəki sərgilər içərisində Berlində və Moskvada keçiriləcək sərgilər Türkiyə üçün daha böyük əhəmiyyət kəsb edəcəkdir.
Martın 11-15-də Berlində keçiriləcək sərginin Türkiyə üçün önəmli olmasının səbəbi təkcə ölkəyə gələn ən çoxsaylı turist qrupunu almanların təşkil etməsi deyil, həm də hər il bu sərgidə dünyanın daha çox ölkəsindən nümayəndələrin iştirak etməsidir. Gələn il burada 180-dən artıq ölkədən 10 mindən yuxarı turizm operatoru və mehmanxananın iştirak edəcəyi gözlənilir. Türkiyənin özəl turist sektoru, Mədəniyyət və Turizm Nazirliyi bu sərgidə iştirak üçün artıq 2000 kvadratmetr sahəni icarəyə götürmüşdür.
Martın 23-26–na nəzərdə tutulan Moskva sərgisi də Türkiyə üçün az əhəmiyyət daşımır. Çünki rusiyalılar almanlardan sonra Türkiyəyə gələn ən çoxsaylı turist qrupunu təşkil edir. Bəzi məlumatlara görə, Türkiyənin Mədəniyyət və Turizm Nazirliyinin ekspozisiyası bu sərgidə 600 kvadratmetr sahədə yerləşəcəkdir.
Bölmənin digər xəbərləri
