DÜNYA
Türkiyə və Yunanıstan arasında hərbi təhlükəsizliklə bağlı növbəti toplantı keçirilir
![Türkiyə və Yunanıstan arasında hərbi təhlükəsizliklə bağlı növbəti toplantı keçirilir](/files/2023/3/1200x630/16998744675603634675_1200x630.jpeg)
İstanbul, 13 noyabr, AZƏRTAC
Ankarada Türkiyə və Yunanıstan arasında hərbi təhlükəsizliyin gücləndirilməsinə dair növbəti toplantı keçirilir.
AZƏRTAC xəbər verir ki, iki ölkənin nümayəndə heyətlərinin üç il aradan sonra keçirilən dördüncü toplantısı Türkiyənin Milli Müdafiə Nazirliyində baş tutub. Görüşdə hərbi gəmilərin mövqeyi, döyüş təyyarələrinin uçuş və manevrləri kimi məsələlərin müzakirə ediləcəyi gözlənilir.
Qeyd edək ki, 2010-cu ildə başlayan müzakirələr daha sonra 2020-ci ildə Afinada, 2021-ci ildə isə telekonfrans yolu ilə təşkil olunub.
Bu il oktyabrın 16-17-də Afinada Türkiyə və Yunanıstan dövlət rəsmiləri iki ölkə arasında gələcək fəaliyyət planını müzakirə ediblər. Hər iki tərəf dekabrın 7-də Salonikidə keçiriləcək Yüksək Səviyyəli Əməkdaşlıq Şurasının V iclası üçün müsbət gündəliyin bir çox məsələləri üzrə konkret nəticələr əldə etmək istiqamətində ortaq hədəflərini bir daha təsdiqləyib.