TÜRKİYƏDƏ ƏN ÇOX DAŞINMAZ ƏMLAK ALICISI İNGİLİSLƏRDİR

26.04.2006 [12:28]
Çap et
A⁺ A^-

AZƏRTAC-ın xüsusi müxbiri Türkiyənin Əmlak Qeydiyyatı İdarəsinə istinadən xəbər verir ki, cari ilin birinci rübündə xarici fiziki və hüquqi şəxslər bu ölkədə 206 daşınmaz əmlak almışlar.

Xarici vətəndaşlara mülk satışına qoyulan qadağanın bu ilin yanvarında ləğvindən sonra üç ayda 565 əcnəbi şəxsə 412 min kvadratmetr daşınmaz əmlak satılmışdır.

Ümumilikdə, Türkiyədə torpaq və mənzil alan 24 ölkədən olan əcnəbilərin siyahısına ingilislər başçılıq edirlər. Bu günədək, 588 ingilis 420 daşınmaz əmlak almışdır.

Almaniyadan olan 267 fiziki və hüquqi şəxsə isə 258 mülk satılmışdır. Siyahıda sonrakı yerləri irlandlar, hollandlar, belçikalılar və yunanlar tuturlar.

Əcnəbilər ən çox Antalya, Aydın, İstanbul, İzmir və Muğla vilayətlərində daşınmaz əmlak alırlar.